Nauhak nute kum 10 mi cun a nu thawn thukam elaw nunau a kap that

May 30 ah USA, Florida ramkulh ah kum 10 mi nauhak nute cun a nu thawn thukam elaw nunau pakhat cu meithal in a kap that. Juvenile Justice Center ah an ko ih nauhak nute cu kum kim hrih lo a si ruangah laithat 2nk thubuai orhter a si.

Thilthlen dan cu nauhak nute ih nu Lakrisha Isaac le nunau pakhat Lashun Rodgers timi cu nasa zetin thukam an elaw ih kut an thlakaw phahphah.

Nauhak nute cu an kiangah a ding ih a nu Lakrisha Isaac in bag a rak seh. Cumi bag sungah meithal a um. Cumi meithal cun a nu thawn buai rerotu nunau cu nauhak nute in a kap ih sizung an fehpi hnuah a thi, tiah theih a si.

Nauhak nute ih nu Lakrisha Isaac cu Lashun Rodgers a thih ruangah kaih a si. Laithat thubuai, meithal thubuai le nauhak zohkhen that lo thubuai orhter a si.

Nauhak nute hin Lashun Rodgers hi meithal in vei hnih a kap ih, “Ka nu dai citcet hlah,” tiah au phah in meithal a kap.

“Hivek hi kum 22 sung sihni ka tuan sungah ka tong dah ngelcel lo,” tiah Orange le Osceola District ih ramkulh sihni Monique Worrel cun a sim.

Mit ih hmutu pakhat cun Lashun Rodgers kah hriam ih a um laiah bom a tum nan, Lakrisha Isaac in a fanu ih kut ta meithal a long ih rak kah a tum ruangah a tlansan, tiah a sim.

A thitu Lashun Rodgers ih ninu Arlene Mathis cun, “Thil cang thei lomi a si. Buainak tenau menah thahawknak tiang a thleng. Nu pakhatin a fate a kilkhawi that lozia a langter. A ngaingaite cun nu pakhatih laithatnak a si,” tiah a sim.