1. Na mit rori ih na hmuhton lomi cu na kaa in a rel lam tlio ciamco hlah. Ziangahtile thu felfai lo a si thei. Na theihmi thu kha a dik rori a si, tiin nangmah ih na hmuhmi thu lawng rel aw.
2. Na theih lomi thu cu, ‘ka thei lo’ ti ngam bupbo mai aw. Thei zikzik vek, thei hnai si loih na um asile na phur a rit maimai.
3. Mi in lungto in an lo den asile deng ve aw hlah. An lo dennak lungto kha na dinhmun hngettertu lungphum ah cangter aw.
4. Minung hi kan ṭhanso, kan lar veten dokalhtu kan nei duh zet. Dokalhmi si na duh lo asile lar le hminthan tum lo mai aw.
5. Buainak na ton asile ret ṭha hirh aw. Na ṭong lai khal cawl awla buainak pawl anmahte an kiam mai ding.
6. Na sinak cu tleu zetin engter awla midang ih meipung lawngte semmihsak tum hlah.
7. Khawruahnak niam pawl thawn buainak va tuah hlah. Annih cu anmah le phutawk thawn buai men hai seh.
8. Mi ih theih an hiar lemlomi thuthup va simphuangtu si hlah. Thudik khal si sehla simphuan ṭheh ding, tinak a si cuang lo.
9. Thingtheirah cu a hmin lawngah lawh ih ei a si vekin khawruahnak khal famkim le zohfiah a tuar thei lawngah langter fang ding a si.
10. Nangmah le nangmah ‘ka mawh ngai’ tiaw ṭheu aw. Ziangahtile ‘ka mawh’ ti kan theiawk caan hi ‘midik’ hram kan thawhnak a si.
11. Na thinlung sungah mi huatmi nei tam tuk hlah. Cuvek caan ah leitlun ah keimah lawng ka um, timi ruat sin awla huat ding zohman na hmu lo ding. Nangmah le nangmah na huatawk asile na mawh a si thlang.
12. Mah le mah rinsanawknak neih tluktu a um lo. Asinan cumicun puarthaunak lo thlenpi hlah seh. Tangdor khal a ṭha ko nan, ralhrut tuknak ah hmang cuang hlah la.
13. ‘Zohman ka care lo’ ti ṭheu hlah. Midang na care lonak kha nangmah le nangmah na mualphohawknak a si thei.
14. Thil ṭha tampi tuah a sual lo. Asinan a ra kirsal ding beisei in mi va bawm hlah. Cumi na beisei asile a ra kirsal lo pangah na thinhengnak meisa a hlioter maimai.
Leave a Reply