Kum 15-16-17 na kim vivo ih Pathian sersiammi na ruangpum khal a dawh vivo. Na ruangpum lawng si loin na thinlung khawruahnak tiangin khaw-hrik khaw-hra a tawivak thlang, a olsamzawng cun falat na thiam zik, na hirha thlang, tinak a si.
Cakhiarnak mit in lo zohtu cun an lo it thok ih khadi dok kuahko in an lo thlir caan na thleng. Asinan duhdawtnak mit ih lo zohtu hrangah ngaihtuah na um laifang a si.
Ziangruangahtile na kum a no tuk laiih hringnun zilthli na dong thiam hrih lo. Na mit ih na hmuhmi ta poh tham na duh ih na thinlung duhnak ta poh ah na ke na kar men, sia le ṭha thleidan thiamnak na tlasam tuk lai.
Himi tleirawl lai caante hi tungfeh milai hrangah a thupi tuk, a hleice in nunau hrangah a hleice.
Ziangahtile na tleirawl suah vanglai ah na mawinak na thianhlimnak bik an lo khiahsak a phanum tuk.
Cumi na nunnak cu na san sungah ṭum khat bak na nei lo ding, vei khat na cangsual pang asile na hringnun a siat ṭheh ding ih nun hlun songsal duh in na ṭap thluahthlo ding, asinan cuvek cu na dam sungah a ra thlengsal nawn lo ding.
Curuangah tui’ na nun hi uluk aw, kunnguhten hmang awla kilkhawi ṭha aw. A tangih thu hmangin ralrinnak ka lo pe.
1. Duhtu le duhdawttu theithiam maw: Fala na si ve thlang, tlangval na mitmei hrekhro khal le mawhthluk ding na um lo. Asinan tlangval cun na parah duhnak maw duhdawtnak a nei, timi theihfiang tum maw!
Duhnak timi cu pangpar tizu tlantu khuai pawl ihsin zir a theih. Khuai cun pangpar a duhdawt ruangah si loin a tizu a duh ruangah a tlan, a hel. Asinan pangpar a uai ih a tizu khal a um nawn lo cun khuai in an pan duh nawn lo.
Cuvekin na ruangrai it-umnak le mawinak fem duh menah tlangval in a lo hel ih nang ih theithiam loin na taksa thianghlimnak na rak pe siang a si pang le duhkhop a ngah tikah a lo tlansan leh ding. Cutikah mitthli canghnap thawn na nunhlun ngai in siraw in na ṭap leh ding.
2. Sumpai ruangah: Sumpai in na fala thianghlim sinak zuar citcet hlah. Nang cu sumsaw ih lei le thlengh theih lo, fala thianghlim na si. Curuangah sumpai mithmai zoh in mi va ngaizawng hlah.
Sumsaw dum in na sinak na zuar asile na duhthusam lo zet thimkhawzing a tlung ding ih fala hnahkhat ihsin hnahhnih ah na suak ding.
3. Tikcu remcang pe hlah: Tlangval maw mipa thawn hmun remcang zet lole tikcu remcang a um caan ah na thinlung pe lamlam hlah.
Mipa hrimhrim cun mit danglam thawn an lo zoh cih ding ih nang in le cumi theithiam lo’n tlangnel zetin na rak ongaw pang a si ahcun na ‘cem’ a si ko. Ramtawipa cun sa a kah theinak dingah tikcu remcang a bawh ṭheu.
Cuvekin mipa khalin nunau an zawlleh theinak caan remcang cu na parah a thleng thei.
4. Bumnak thang: Mipa cun thu tintian suahkhawm in lemzu phunphun a lo hrai ding. ‘Ka lo duh tuk’ ka lo nei ding’ tivekin a lo thlem dingih thang a lo kam ding.
Na lung luailo ih thaisun timi na thlir ban lo ahcun na cangsual tengteng ding. Na fala thianghlim sinak na pek asile mitṭhep karah na nun pumhlum a thlengh-aw danglam thei ti thei aw.
Cu pa cun a duhnak a pitlin hnu cun a lo uksak nawn lo ding. Ekinn cu ek suak pawl in an mamawh laiah an pan ṭheu, asinan ek an thawh ṭheh tikah zohman in dunglam an hoikir nawn lo, ti thei aw.
5. Ka nun cu keimai ta ti hlah: Nang hnakih tonteh nei tam, na hnakih upa lole na nu le pa in thu an lo sim tikah ‘ka nun cu ka ta’ ti uk-o hlah.
A ngaingaite cun hringnun hmuihmel theithiam ding khopin na pitling hrih lo, tonteh khal na nei mal tuk. Cu betah cuvekih thu mi el hmang pawl khi mi-aa deuh an si ih an lamzin netnak khal duhum lo hlir an tong.
Mi ih culnel zomi, pasal zan hnihkhat nei, nuthlawi an si duh ṭheu. Curuangah nang cu tikcu ṭha na nei lai, na hmailam a eng tuk lai.
Na hringnun lamzin tluang zet le nuam zetih na hman theinak dingah na nun kha nangmah a lo ngainatu, a lo duhdawttu taktak hnenah ṭhumaw aw. Ruahnak pekmi hua hlah.
Leave a Reply