Na duhmi hnakin a lo duhtu hril hna thiam aw (7)

Duhdawtnak hi ziangtin kan ruat? Mi pakhat kan duh tikah amai’ ṭhatnak hrang zawnruat ih kan duhnak hnakin kanmah in nuamter thei dingih kan beisei ruangih va duhdawt sawn kan si ṭheu. Cuti a si ceng ahcun na nun lo nuamter theitu kha na hril thiam a ṭul, tinak a si.

Ziangahtile na duh kuahkomi in thinharnak a lo thlen ding hnakin a lo duhtu in thinnomnak a lo pek thei ding kha a thupi sawn. ‘Kan duhmi’ le ‘in duhtu’ karlak hlatzia kan zoh hnik pei!

1. Linglet nun hman: Na duhmi nupi/pasal na neih asile a duh vekin na um a ṭul ding. Asinan a lo duhtu nupi/pasal na neih asile na duhdan vekin na umter thei thung ding. Cucu linglet nun hman dan rori a si.

2. Na damlo caan ah: Na duhmi nupi/pasal na neih asile na damlo caan ah nangmah ih dilngen hratin a lo tuamhlawm ding. Cu hmanah na di a riam thei lo ding. Ziangahtile anih khalin a hmin men in lo tuamhlawm fang a si ih a netnak ah na dam har tuk tla cun a lo ning mai ding. Asinan a lo duhtu nupi/pasal nei awla na damlo caan ah na beisei hnakih nasa in a lo tuamhlawm ding.

Couple's Sleeping Positions and What They Mean

3. Sal dinhmun: Sal cun a pu’h thu a ngai bangin na duhmi nupi/pasal na neih ahcun na dam sung a thu ngai nain na khawsa ding. Anih in a duh dandan le a duhnaknak ah a lo hruai ding. Asinan a lo duhtu nupi/pasal nei awla na duhdan siseh a duhdan siseh bangranten nan tuah thei ding.

4. Neh le sunnak: Minung cu kan ruahdan, pomdan a bangaw thei lo. Cuvekah na duhmi nupi/pasal na neih asile thukam elawk caan le thil hril ding a um caan ah na sungkhan ringring a ṭul ding. Asinan a lo duhtu nupi/pasal nei awla cuvek caan ah rualranten thu a fehpi ding ih buainak a um lo ding.

5. Thinlungput: Na duhmi nupi/pasal na neih ahcun na duhzia a lo theih tuk ruangah na parah a hngal zet ding ih a lo hmuhsuam ṭheu ding. Asinan a lo duhtu nupi/pasal na neih ahcun tangdornak lungthin thawn a tlonten a lo tlon lam ding. Curuangah na nun khal hlimnak in a khat ding.

6. Phatsannak: Harsatnak. tlaksiatnak le damlo ngawr caan a thlen tikah na duhmi nupi/pasal cun a lo phatsan mai ding. Ziangahtile a lo duhnak tel lo, nangmai duhnak lawng ring ih lo nei a si ih nang le rinsantlak na um nawn lo tikah phatsan mai lo cu hmabak a nei nawn lo. Asinan a lo duhtu cun ziangvek dinhmun ih na um khalah rinum takin a lo umhnawh ding.

7. Thih tiang: Duhdawtnak cu mai ṭanghma sialnak kan ti zo kha! Na ṭanghma na sial fuh lo ih na duhmi nupi/pasal na neih ahcun na hril sual camsiatnak in na thih tiang a lo uk ding. Asinan a lo duhtu nupi/pasal thlawsuah na hril fuh ahcun lungnuamten hi khawvel na suahsan thei ding.

Be the first to comment

Leave a Reply

Your email address will not be published.


*