Na Crush in a lo duh ve theinak dingah na tuah zuam ṭulmi (6)

‘Crush’ timi cu kapkhat lawngih duhdawtnak lole uarnak a si. Nangmah lawngin a thupten na uarmi khi ‘crush’ cu a si mai.

Himi ah na uarmi cun na duhzia a lo thei lo tla a si thei, a thei tla a si thei. Asinan a lo uar ve lo, a lo duhdawt hrih lo.

Cumi cu ziangtin a lo uar ve thei ding? Ziangtin a lo duhdawt ve thei ding? timi pawl kan zoh hnik pei!

1. A khawruahnak laksak aw: Sim duhmi cu nan mit a tonawk caan ah hni sersiten zoh aw. Cule vei le khatah khawdang hoisan awla cumi hnuah hei zohsal aw. Na crush ih thinlung le khawruahnak cu malte in a danglam cih ding.

2. Cibaibuk aw: Hihi cu a olsam tuk. Cibaibuk ti tikah kutkaihaw tengteng a ṭul lo. Nan hmuhawk tinten mithmai panten, ‘na dam maw?’ tiah sut aw. Na crush kha ton a harsat lo le a umnak ah va pan ṭheu awla ṭongkam thlum nawnin va cu-kha ṭheu aw. Cutin nan karlak pehtlaihawknak a fuh vivo ding.

Online caan khalah pelh loten, ‘na tho ṭha maw?’ ‘Na sinpi ko maw?’ tivekin hei ter ṭheu aw.

3. A ngainatzawng sut aw: Na crush ih ngainatzawng theih ding cu na ṭuanvo hrimhrim a si. Tlawngkai tlang nan si le ‘saya/ma in in zirhmi ka fiang thei lo, nangmah in i sim thei pei maw? tivekin sut aw, naihniam aw.

Lakphak dawr le in-ei dawr nan fehtlang asile a ngainatzawng sut aw. Cule nan totlang laiah na thilri pakhatkhat bag, tangka bawm lole phone kha a kiangah tan in, ‘I rak kilsak aw’ tiin hmun dangah fehsan aw. A thinlung ah na rinsanzia a cam mai ding. A lungsung puk ah hmun na luah vivo a si mai.

4. Ṭongkam ṭha hmang aw: Nan biakawk caan ah ṭongkam mawi le ṭha pol awla hmang aw.

Thu ṭha lam lawnglawng relpi aw. Asinan ṭong tam tuk hlah. ‘A tlokciar tuk’ tiin a lo ning pang ding. A lo biaknak khal ṭhaten ngaisak aw.

5. Thu sutron aw: Thil na tuah tikah a hmuh dan ah a ṭha maw, ṭha lo? A lungkimzawng a si maw? tivek sut paih aw. Thil dang suh ding ciamco na theih lo asile na angki hrihmi a mawi le mawi lo, na sam tuahdan na kaihawk le kaihawk lo tivek men khal sut aw.

Cutikah thu na suhmi hmuahhmuah kha a lungthin zeltu ah an cang ding ih a lo ngaihsak vivo ding!

6. A duhlozawng tuah hlah: Na crush ih duhlozawng, uar lozawng hminsin awla tuah lo aw. A ngainatzawng thlun vivo aw. Nan ngainatzawng, duhzawng, uarzawng a bangawk nanana cun nan thinlung a hmunkhat vivo tinak a si ih rei rial loah a lo duhdawt cih ding.