Nikum lai ihsin nunau ralkap pawl a thupten kaihrem ih nupi sinak hmanpi theutu ralbawi pakhat cu North Korea acozah sihni in an kai, tiah Daily NK thuthang cun a tarlang.
Anih hi ralkap division 5 ih political hotu ralbawi a si ih a hmin ah Kim tiah theih a si. A kum hi kum 40 kiangkap hrawng a si, tiah thuthang ah an ngan.
2018 laiah Political Department ah Director a tuan ih Kim cun a kuttang ralkap nunau pawl a puahcok theu ruangah tuvekin an kaihnak a si.
Kim hin ralkap ihsin suak mai ding nunau pawl a bat deuh theu, tiah an sim fawn.
Ralkap suahsan zikte nunau pawl cu acozah party sungtel si dingah a thlem hai ih a naihniam ngah vivo hnuah nau a raih hai, tiah an sim.
North Korea ahhin ralkap sungah nunau pawl an zonzai zet ih ralbawi pawl ih hmuhsuamnak an ton tikah hremnak khohkhah khal an tong dah lo.
Cuhnak sawn in nunau ralkap pawl in kaihhrem an si thu an phuansuak tikah anmah lamlam cawh an kuanter theu, tiah theih a si.
Leave a Reply