Myanmar ram hrangah ralthuam tollut thawn pehparaw in Thailand acozah cun rinhlelhmi acozah hnatuan pawl zingzoinak a nei rero, tiah Home Affairs Ministry zung cun thu an suah.
Chonburi Province, Sattahit ih khawlal hlun pakhat ih hohanak in ralthuam tollut pawl an kilvennak ah tlawngkainikhat ahkhan acozah hnatuan upa lam an kai, tiah theih a si.
Bangkok, Chonburi, Kanchanaburi, Udon Thani le Chiang Mai ah hmun 21 ih innpi sungah ralthuam tam zet an thuhmi check theinak thuthennak zung lam ihsin caken (warrant) 16 an la ih cekfelnak an nei.
An cekfelnak ahcun daan ih sian lo meithal thilri le rinhlelh kai minung 5 an kai, tiah Thailand palik bawi Suwat Janyosuk in a sim.
An rinhlelhmi mi panga pawl hin hmun dangdangah ralthuam tor le seng an thup ih an kai. Daan le dun thaten um thei dingah committee an din ih an kaihmi pawl parah thubuai tuahsak dingin an zuam rero lai.
An kaihmi lakah ralthuam lawng si loin Myanmar mi pawl Thailand ramsung ah daan lo ih an luh thei dan tiangin hi pawl in an tawlrel, tiah theih a si vivo.
An kaihmi ralthuam tam sawn hi an umnak Province acozah ih theihpinak ca pawl a tel. Curuangah Myanmar ramsung ih ralthuam tollutu ahhin acozah luban ziangmawzat an hrolhaw a si, tiah an sim.
Khawlal hlun Danipol cun ralthuam pawl hi an leikhawm vivo ih Myanmar ramsung ihsin a lei duhtu pawl hnenah hlanlaipi ihsin an zuar rero zo, tiah a sim.
Leave a Reply