Myanmar hrambun Call-center ong ih mi bumtu Thailand palik in kai

Myanmar ramsung ah hrambun tahratin Internet ihsin sumpai mi bumtu China mi thenkhat Thai palik in an kaih thu October 31 ah thu an suah.

Kum 33 mi Chinese Mr. Huang Tianyong cu Bangkok ih Boxing thongnak zung ah an kai ih anih hi milai zuar thubuai le mi sualral tomkhawm Gangstar thubuai orhter a si ding.

Amai hohanak in Thai-Myanmar ramri Myawady khawpi ah Call-center a ong ih Thai, Malay le Philipines ram ihsin a hnenah hna an ra tuan. A hnatuantu pawl cu internet ihsin mi bum a zirh ih sumpai ngah mal pawl cu a hrem hai, tiah Thai palik cun an sim.

Thailand palik hin internet ihsin sumpai mi bumhmang pawl kai dingin 2021 ihsin an rak zuam zo ih Thailand mi le ramdangmi 19 kaih theinak thusuah an neihmi sung ihsin mi 7 an kai zo, tiah an sim.

An kaihmi pawl ih simphuannak vekin annih hi Chinese mi Mr. Huang Tianyong hnenah hnatuantu an si ih Internet ihsin mi an bum thei lo asile room thim sungah a kharhkhum thul, an lu a meh kholhsak thul, dynamo in a holhter thul tivekin a hrem theu.

Thailand palik ih kaihmi mi 7 pawl cun an suah theinak dingah Chinese pai’ hnenah Thai Baht 50000 an pek thu palik hnenah an rel.

Thailand palik cun thubuai tawlrel dingah Myanmar palik hnenah thu an thlen nan, Myamar palik in Chinese pa an hum linglet ih Thailand mi 7 hin sumpai thapawknak ah leiba an pek thei lo ruangah an ram ih dawi tlung an si, tiah Chinese pa an ttan.