Myanmar aiawh ih Japan Olympic fehtu mi (2) mualphoza in puantom zual lawng an hmabak

Tui’ an tuah reromi Japan Olympic zuamawknak ah Myanmar aiawh in minung (2) an feh.

Tui’ zing ah Olympic nunau single arhmui thawi (badminton) ah group netabik zuamawknak cu Myanmar arhmui thawi thiam Ma Thet Htar Thuza le Belgium nu Lianne Tan an zuamaw. Cumi ah Belgium nu cun puai hnih ah puai hnih fai in a neh.

Ma Thet Htar Thuza hi a hlan anmai group thotho ah Indonesia nu thawn an bengaw dah ih cumi khalah tu vekin a sung thotho. Ma Thet Htar Thuza cu mi pahnih lakih a sun ruangah an group ihsin a tla fel, tinak a si.

An group ahhin pakhatnak ngahtu lawng an kai ding ruangah Thet Htar Thuza cu zohman nehmi a nei si loih cutin puantom zual ih tlun timtuah a man, tinak a si ih khatlamah caan saupi a rak suangtuahmi pawl tikcu rei lote ah a ziamral men.

Ma Thet Htar Thuza lawng a si lo, meithal kah zuamawknak ih tel Ye Htun Naung khal le mipa meithal kah zuamawknak 10 meter ah (14) nak dinhmun lawng a thlen thei ruangah beisei ding a um nawn lo.

An pahnih in Myanmar aiawh ih tel theisun an si nan, Myanmar rampi hminthatter dingin an thiamnak in a tlin lo ih an tuanvo an hlensuak thei lo. An pahnih in tlawmla zetin puantom zual ih tlun lo bak, titheimi an nei nawn lo.


Be the first to comment

Leave a Reply

Your email address will not be published.


*