USA, Texas ramkulh ah June 21 ahkhan nauhak kum 5 pate cu motor sungah an hngilh (tan) ih thawsa tuar loin a thi, tiah theih a si.
Nauhak pate ih nu cun a fapa upa sawn kum 8 mi ih Birthday lomnak hrangah an unau hnih in motor in a phur ih an lengsuak.
An tlunsal tikah a fapa kum 8 mi thawn motor ihsin an tum. A nau kum 5 mi khal a tum ve ah a ruat ih motor sangka a khar.
An umnak hi Harris County ah a si ih nikhua 100 degrees laiin a hlum, tiah theih a si.
Nupinu cun a fapa kum 5 cu motor sungah rei zet a khumtar. Palik pawl hnenih a simnak ahcun a fapa upa sawn ih Birthday tawlrel ah a hnahnok (busy) tuk ih a fapa nauta sawn a mangngaih nawn lo, tiah a rel.
Nazi 3 hrawng a rei tikah a fapa nauta sawn a hmu lo ih a hawl ciamco hnuah motor ihsin a tum lai a hmuh lo a theisuaksal.
Cutin nupinu cu motor ah a va tlan vurvo. A fapa cu motor sungah cau hnephnep in a va hmu.
Sivai thiam pawl ih bomnak a dil nan, a fapa ih nunnak an runsuak thei nawn lo, a thi tariai.
Nupinu cun palik pawl hnenah thiamthu a rel ih a fapa unau sawn Birthday hrangah a busy tuk ruangah tuvekin a fapa nauta sawn a ngaihsak man lo thu le a fapa nauta sawn cu motor sung ihsin suak dan a zirh theu ih seat belt on dan a sim theu thu a rel. Asinan palik pawl cun an hmanmi motor hi anmai ta si loin midang ta an sanmi a si, tiah an sim.
Tui’ kum sungah US ahhin motor sungih nauhak hngilh (tan) ruangih thi a panganak a si thlang, tiah palik pawl in an sim.
Leave a Reply