Mipi ralkap veng sungmi in an kai ih, ‘ralhrang kut ih in pek ding hnakin in that sawn uh,’ tiah a dil

Yangon ramthen, Dagon Seikkan Township, Yuzana Garden City ih inn pakhatah June 26, zan nazi 7 hrawngah thil puak a um ih mino pakhat a thi.

Mino pakhat cu lamzinpi parah hriamhma pu in a tlansuak. Cumi cu veng sungmi mi thenkhatin an kai ih ralhrang kut ah an ap.

“Minote a si ih hriamhma a tuar. Thisen thawn a si ih veng sung mi thenkhatin an kai ih palik kut ah an ap. Hivek pawl hrangah dothlengnak hlawhtlin a har ding,” tiah veng sung mi pakhat cun a sim.

Palik pawl cu thil puak umnak innkhan an va zoh bet ih mino pakhat thi in an va hmu fawn.

Lehhnuih theih vivo dan ah hi mino pahnih hin kut tuah bomb an tuahmi hmun dangih thiarsuak an tum laiah a puak pang, tiah theih a si.

Himi thu ah  Yangon hrambun Urban Guerrilla group cun June 28 ah hitin thusuahnak an nei.

An sungtel pakhat cu ‘rukru’ tiin veng sung mi 4 ih hohanak in an kai. Mino pahnih hi  Urban Guerrilla group ih sungtel an si vekin hriamtuar kaitu veng sung hotu mi 4 cu a zamrang thei bikin thianfai an si ding, tiah Special Ninja Force cun thusuah an tuah.

A kaitu ih hohatu inn za lal Aung Kyaw Min, Swe Poe dawr neitu, vuakvelhnak ih phur zettu Bea Che le zu dawr neitu Aung Lay an si ih Special Ninja Force in, “Leiba kan lo hlam ding. Phubu la dingin Yuzana ah kan ra cing ding,” tiah an sim.

Inn za lal Aung Kyaw Min cun veng sungmi pawl hnenah ‘Rukru, rukru, inn an bauh tizawng in a au ruangah an kai ih an vuak ciamco,” tiah Special Ninja Force cun an sim.

Hriamtuar ih an kaihmi pa cu an velh rero laiah, “In that lohli uh,” tiah a au ih social media ah a thang nasa.

“Mipi ralkap lam hin kaih an ton tikah inn parah an relh duh nawn lo. Ziangahtile mipi harsatnak thlenter an phang. Mipi hi an rinsan bikmi a si. Asinan tuvekin kan rualpa cu mipi lala in an kai ih ralhrang kut ah an ap timi cu riahsiatza rori a si ko,” tiah Yangon hrambun Urban Guerrilla group ih hotu pakhat cun a rel.