Yangon, Mingaladon ih ralkap tlawng pakhat a simi No. (2) BHS tlawng ‘Aungsan Thurah Hla Thaung tlawng’ ih tlawngta nute cu hridai in a awkthataw, tiah theih a si.
Hi tlawngta nute cu sayama le tlawng uktu in rittheih sivai a tham, tiah an puh ruangah July1, simlam nazi 5 hrawngah a thataw, tiah an sim.
Aung San Thurah Hla Thaung tlawng ih system thar phun (11) D khan ih tlawngkaitu Ma Ein Khit Moe Myant Tun timi nute cu a room sayama Daw Khaing Khaing in rittheih sivai a hmang, tiah a room ihsin a dawisuak.
An dawisuah hlanah an khan sayama le tlawng uktu Major Ye Myint Aung in tlawngta nute cu ritheih sivai a tham ngaingai a si, tiah thukamnak an tuahter ta.
“Tlawngta nute cu rittheih sivai a tham tiah an sayama in hramhram in a phuanawkter. Tlawng uktu Major hnenah a fehpi ih cafung (ballpen) sen in a hmin a rak khar.
Cati sen ih hmin a kar laiah khuitawk tlawng khalin kum 5 sungah an lo cohlang lo ding, tiah a sim ta.
Tlawngta nute cu inn ah a tlung ih a ningzak le thinna tuaraw loin hridai in a awkawthat. A ruak cu sibawi pawl in an zohfel tikah ritheih sivai a rak tham lozia an hmusuak,” tiah tlawngta nute ih nu in a rel.
A fanu thahawk thu ah a nu cun hitin social media ah a thlah.
“Ka fanu, thil dik lo an puhnak thuthang pawl an thup hrim. Ziangruangah a hlankhanten nu le pa in ko lo. Cuti tlawng an dawi men. Tlawng ah ziang a cang ti kan suh asile zianghman a cang lo an ti men fawn.
Atu-ahcun thuthang a darh tuk zo. Nu le pai’ tuar natzia hi in theihthiampi ve uh. Nan ci tuh rah seng ding nan phang lo mawsi! Tlawng diklo ah ka fanu ka ret sual ruangah tuvekin siatnak kan tong a si hi!,” tiah a ngan.
A thitu Ma Ein Khit Moe Myant Tun ih rualpi pawl cu social media ah an rualpi thih thu post lo dingin a nu le pa in zangfah an dil.
Leave a Reply