SAC ralhrang mangpa Min Aung Hlaing in tlangpar hriamhrei kai pawl remdaihnak thu rel dingah a sawm betsalnak ah tuni tiang zohman uksaktu a nei lo, tiah theih a si.
SAC ralhrang thawn remdaihnak thu kan rel thei lo titu tlangpar hriamhrei kai pawlkom pawl cu June 14 Min Aung Hlaing in a sawmsal.
Asinan, tuni tiangah tlangpar hriamkai pawlkom hnen ihsin thu lehkhirhnak zianghman an tuah hrih lo thu le lamzin dang hawl dingin in sim tiah SAC ralhrang lam cun thu an suah.
Tu tiangah remdaihnak thurelkhawm ih va fehtu hi NCA hminkartu tlangpar hriamhrei kai pawlkom 10 lak ihsin 7 an feh zo. NCA hminkar lotu hriamhrei kai pawlkom 3 khal an feh zo ih an zaten pawlkom 10 an feh.
Asinan pawlkom pakhatteten tonkhawmnak a tuah ruangah tu tiangah pawlkom 8 lawngin Min Aung Hlaing an tong hrih ih pawlkom 2 in an tong ngah hrih lo.
Cumi hnuah SAC ralhrang cun amah tong dingin le remdaihnak thu relkhawm dingin sawmnak a tuah betsal ih tlangpar hriamhrei kai pawlkom tum a simi KIA, KNU, MNDAA, AA, KNPP, CNF le TNLA cun SAC ralhrang ih sawmnak an cohlang lo.
Min Aung Hlaing cun amah tong duhtu pawl cu June 30 ni netabik khiahsak in hmin cazin pe ding a ti mengmang nan, June 27 tiangah zohman in an uksak hrih lo.
SAC ralhrang thuphuangtu Zaw Min Tun cun, “Atu caan hi ramdaihnak relkhawm dingah tikcu remcang bik a si,” tiah Nay Pyi Taw ih a vei 16nk SAC ralhrang thuthang simfiangnak ah a rel.
Leave a Reply