Min Aung Hlaing fanu le a rualnu ih neihmi Bar bomb puah

Mani July 6, zanlam nazi 6:20 ahkhan Yangon, Sule lamzin le Kanna lamzin tonawknak ih ‘Hiso Heaven’ bar cu kut den bomb puah a si.

Hi bar neitu hi Min Aung Hlaing ih fanu Khin Thiri Thet Mon ih rualnu Jue Chit Thinzar le Thet Min Swe tei’ nupa ta a si, tiah theih a si.

Kut den bomb in zan nazi 6:20 hrawngah Hiso Heaven bar cu den a si nan, a puak thei lawk lo.

SAC ralhrang pawl zan nazi 6:55 hrawngah an ra thlen hnu lawngah a puak. Hi bomb puahtu hi Mother Son Yangon Force tatzin 1 le UG.47 pawlkom ih cangvaihnak a si.

“Kan theih dan vek asile hi ‘Hiso Heaven le The Box neitu hi mino le PDF pawl kaihkhihnak ah an pehtlaihaw zet. Bar neitu hi zo bik teu a si ti kan fiang lo nan, ralhrang thawn a naihniamaw zettu an si.

Yangon khawpi sungih mino le PDF an kaih tikah hi bar neitu hi Min Aung Hlaing ih fanu Khin Thiri Thet Mon ih rualnu ih ta a si ih amah khal Dalan a tuan, tiah kan thei,” tiin Mother Son Yangon Force ih hotu Ko Naing in a sim.

Bomb puah a si ruangah Kyauktada Township tualsungmi pakhat cun ralhrang pawl an ra ih lamzin an phit. Cule mipi pawl khal an cek rero, tiah a sim.

“Bomb an ra deng ih a puak man lo. Cumi cu ralhrang ralkap le palik in an ra la ih lamzin parah anmah in an puah. Motor pawl an kham hnuah an puah. Zohman hriamhma tuar an um lo,” tiah a sim.

Himi bar neitu hi Min Aung Hlaing ih fanu Thin Thiri Thet Mon ih rualpi tha Chin Thinzar Wai Pyu a si ih anih hi company hnatuannak tam zet neitu a si.

Curvy Maist Trainer hminthang a si ih Yankin ih The BurDubai, Safe House Club, Hiso Heaven bar, The Flash Club telin nuamtawlnak club pawl Min Aung Hlaing fanu thawn an tuantlang, tiah theih a si.