'Milian bik cazin ih tel lo poitinak ka nei lo' tiin Bill Gates in harsa bomnak ah $20billion luangliam

Bill Gates With Fareed Zakaria: How To Prevent The Next Pandemic — NEW YORK, NEW YORK - MAY 03: Bill Gates discusses his new book 'How To Prevent The Next Pandemic' onstage at 92Y on May 03, 2022 in New York City. (Photo by Michael Loccisano/Getty Images)

Bill Gates cun US Dollar 20 billion mi harsa bomnak ah a luangliam, tiah theih a si.

Leitlun milian bik sinak rak luah theutu Bill Gates cun US Dollar 20billion cu Bill and Melinda Gates Foundation fehtlang in harsatnak tuartu pawl hnenah a hlu.

Leitlun pulhri ruangah le Ukraine ram buainak, leitlun harsatnak phunphun in cimbuaimi pawl zawnruahnak in Bill and Melinda Gate Foundation cun US Dollar 20billion an hlutnak a si.

Bill and Melinda Gates Foundation hin leitlun pulhhri a len hlan ih an hlu theumi sumpai hnakin tu-ah 50% in an pe tam deuhdeuh.

Bill and Melinda Gate Foundation hin kum tinten US Dollar 6billion an hlu ringring ih 2026 ihsin US Dollar 9 billion hlu an tum thlang, tiah theih a si.

Bill Gates hi a hlanah cun leitlun milian bik a si theu nan, tu-ahcun US Dollar 114 billion nei in leitlun milian bik 4nk ah a um.

“A lian bik hmin cazin ihsin ka tumsuk (tel nawn lo) men thei. Asinan milai hin nitin harsatnak kan tonmi pawl a cangtheitawkih bombawi dingah ka neihmi sumpai hi pawlkom hnenah pe dingin tuanvo ka nei.

Midang pawl khal tuvek dinhmun harsa lakah bomnak pe ve dingin ka beiseisak,” tiah Bill Gates cun a sim.