Middle school uktu Sayamagyi an kap that

Sagaing ramṭhen, Monywa peng, Si Thar khua ih Middle School tlawng uktu sayamagyi Daw Soe Myat Min cu lamzin ah an kap ih a thi, tiah tualsungmi pawl in an rel.

Kum 44 mi Daw Soe Myat Min hi Monywa-Ayartaw lamzin kiangah June 5 ah an kap that, tiah theih a si.

Hi thihnak thu thawn pehparaw in hmin tarlang duh lo mi pakhat cun, “Anih hi Myothit veng ihsin Si Thar khua a fehnak lamzin ah an kap. Non-CDM tlawng sayamagyi a si. Anih hin SAC ralhrang ih phuanmi tlawngkai dingin khuami pawl a hringhro. Curuangah an kap that a si bik. A hlan ihsin tlawng saya/ma pawl CDM tuah dingin dilngennak le theihternak an nei rero ko nan, ziangah a siarlo ruangah a tuh rah a seng a si ko,” tiah a sim.

Lailak tlawng uktu sayamagyi Daw Soe Myat Min cu a awm ah meithal cerek pakhat a lut. A kehlam ban khalah cerek hnuhma a um ih lamzin ah a thi ṭhing sar a si.

Hi thihnak thu ah SAC ralhrang lam cun PDF pawl ih kuthnu tiah a phuang.

Hi thu ah Monywa hrambun PDF pawl suhfiang an si tikah zianghman an nemhnget thei hrih lo thu theih a si.

SAC ralhrang cun June 2 ihsin Myanmar rampum tlawng phuan dingin thu a suak. Asinan dothlengnak pawlkom pawl cun zohman kai lo dingah thu an suah ve.