American ram ih hlasak thiam, hlaphuah thiam le lam thiam zet, Pop siangpahrang (king of pop) an timipa Michael Jackson hi kum 150 tiang leitlun ah nungdam duhtu a si.
Curuangah a kezim ihsin a luthlung tiang țhaten zohsak ih kilvengtu dingah sibawi minung (12) cu a inn ah hnațuan a pe.
A in le ei dingmi tirawl pawl khal cu a ei hlanah zohfelnak cetnung (cetaboratory) thawn an cekfel hmaisa ringring ti a si.
Nitin taksa cangvaihnak (excercise) a tuah tikah tuahmawh khawngdengawknak um lo dingin amah kilvengtu dingah minung 150 hnenah hnațuan pek an si.
A ihnak ihkhun khalah thilthiang (oxygen) caan dikten ngahter theinak thilri thawn tuah a si. A taksa ruangțhen hrangah poipeng in țulnak a um pangah tiin a hlutu ding minung tor le seng ret țhepțhep cia ringring a si.
Hitin mangbangza timtuahawknak maktak thawn kum 150 sung leitlun ah nungdam ding cun a fingkhawiaw. Asinan…
June 25, 2009 ahkhan kum 50 te lawng a si lai nan, a nunnak a cem ih leitlunpi cu a suahsan ta riai a si cu! Amah fingkhawi le kilveng tuamhlawmtu sibawi 12 pawl ih taimak suahnak le thil thiamnak khal cu Michael Jackson hrangah cun umzia a nei nawn ta lo ee.
Los Angeles le California ih um sibawi mi hminthang pawl ih țanpitnak khalin a nunnak cu humhim a theih nawn lo.
Kum 25 sungah sibawi pawl ron ta hmaisa loin zianghman a tuah ngam lotu Michael Jackson cu leitlun ah kum 150 sung nungdam dingih sunmang a rak manmi kha a hlensuah taktak thei lo a si cu!
Leitlun ih a ni netabik ni a simi a thih ni ah leitlun killi ih um milai pawl cun Goggle Search hmangin Michael Jackson thuhla cu mipum siarcawk loin an zingzoi in an buaipit. A ruak an vui ni ah mipum million 2.5 in a uinak thu langter in online parin an rak zoh.
Hitluk ih mi hminthang milar hlasak thiam le laam thiampa Michael Jackson cun leitlun ah kum reipi nungdam dingin sunmang a rak man ih, amah le mah khal tithei patawpin an fingkhawiaw ko cingin leitlun nunnak cu zianghman in aamahkhan pek thei a si lozia a takin a langter a si bik ko.
Cu bangin minung kan nunnak cu tikhu vek, mero vek, hrampi le pangpar vek an si tiah Bible Cathiang in fiangten nun a tawizia ralrinnak in pekmi hi a dik zet.
Atu ah a mawi zet le a no zet in kan hmuhmi nu lole pa cu pangpar bangin rei lote karah an uai lohlisal ding ih, tikhu bangin a hloral lohlisal mai ding!
Unau, ziangtik tiang hih leitlun ah na nungdam ding ti nangmah le nangmah na theiawk lo bangin, zohman in an lo theihpi ve lo. Leitlun ih nan caan hman netabik hi tuini lole atu rori khal hi a si thei.
Ziangtikah, ziangtin khuitawk hmunah na thi ding ti na theiaw lo ih, zokhalin an lo theihpi lo.
Na mawinak, hminthannak, leitlun hlawn thilri le sumpai na hlawh ih na khawl reromi khal zianghman na keng thei lo ih midang kut sungah na taanta a țul ding. (Ramthim Arsi ta lakmi a si).
Leave a Reply