Leitlun ah tungfeh milai hin ziaza phunphun kan nei cio, kan lungput khal a bangaw thei lo.
Cucu minung famkimtertu tla a si men thei! Hringnun ah kan parih thilthleng theumi pawl harsatnak le nomnak, tahnak le lungawinak a thlen caan ah lungput thiangte in kan cohlang thei ding, a thupi zet.
Mi tlaitluang pawl cu an parih thilthleng ruangah an ziaza a siat phah lo ih an lungput khal a danglam cuang lo.
Kan lungput thianghlim ding le ziaza thiang kan neih theinak dingah mi tlaitluang pawl hnen ihsin zir uhsi!
1. Ngaidam nun: Thil ziangkim hi ngaithiam theh thei a ol lo.
Asinan ngaidamtlak, ngaidam tulmi a um ih cu pawl ngaidam thei hi mi tlaitluang lungput a si. Cu lawng si loin ngaidam phu lo khal an ngaidam thei ruangah anmai nun lala a hahdam linglet thung.
Mi ngaidam nun neih hi mai nun diriam zetih hmannak a si vekin thinhengnak khal a dawihlo thei ruangah zir hramhram ding, a si.
2. An thin a fual: ‘Thil ra thleng ding hngah cuahco tlukih caan rei a um lo,’ an timi kan thei theu ding.
Thinlung bultan pawl cun an hrangih thil tha ra thleng ding khal an hngah thei lo ruangah sunralnak an tong theu.
Mi tlaitluang pawl cu cuvek an si lo. Hngah theinak nun an nei ih thin fual zetin caan an hmang thei.
Kan pehtlaihmi khatlam remcan lonak ruangah hngah deuh a tul ih kan hngah tento thei hin kan hrangah nun ropi kan sar a si ih ziangvek harsatnak khal kan paltlang thei hi a rak si.
3. Theihthiam nun: Milai hin kanmai’ phutawk in buainak kan nei theh.
Cun duhdan pomdan bangaw lo dingih Khuanu’h sersiammi kan si hrimhrim.
Cumi bangaw lo milai lakah ka leng, ti thei in mi tlaitluang pawl cun mi theihthiamnak an ngah zet.
Anmai duhdan lawng fehpi loin mi ngaidan khal ruahsak hna an thiam ih mi an thinhengter zik a si hmanah an tongkam an remaw lohli thiam.
Theihthiam nun neitu cun ziangkim hi a thazawng, a engzawng hlir in an hmu ih an nun a hahdam rori.
4. Ngaihthah nun: Hringnun ahhin mah thawn pehparaw lemlo thil ah buai ciamco ding a si lo.
Mai hrang thathnemnak um cuang si lo ih tur-pa-kak ciamco khal hlawknak hnakin sunralnak lamzin an zawh duh zet.
Mi tlaitluang pawl cun thil tha lo, thu tha lo hrimhrim an thluak ih a luh pang a si hmanah an ruat buai paih lo, an ngaihthah thiam.
Mah thawi pehparaw lemlo thu kan ngaihthah thiam a si le kan thinlung a zangkhai ding ih kan taksa khal a harhdam ding, a si mai.
5. Thlahtlo nun: Hringnun hi buainak hlirin a zel ringring thluh ce lo.
Thim a um vekin tleu khal a um kel. Curuangah mi tlaitluang pawl cun tleu ih um na cingin thim ih an nunhlun an ruat nawn lo, an thlahtlo thei.
A liam zomi thu, hriamhma lawnglawng kan ruat buai a si ahcun kan nun in khawtleu a hmu thei lo ding.
Cun, kan parih vei khat hman that suah dah lo rualpi tivek khal seherh ding a um lo, thlahliam men ding a si.
A liam zomi caan harsa na thlahtlo thei asile na nun ah donharnak hmuah a hlo ding ih nun thawveng zetin manmual nei zetin na hmang thei ding.
Leave a Reply