1. Mi pakhat ruangah na mitthli a tlak kha na mawh lo.
Asinan cui’ na mitthli hul dingin na zuam lonak kha na palhnak a si.
Mi pakhat ruangah kumkhua in na tuar ding a si lo. A tlami na mitthli hulter thlang awla fiang zetin na mitmeng thlang hnik.
2. Mi pakhat ruangah hringnun hi hamkha fualfo in na theih kha na mawh lo.
Asinan cui’ na hringnun hamkha zet thlumtersal na tum lo kha na palhnak a si.
Mi pakhat ruangah kumkhua in na hringnun na khater ding a si lo. Zuam awla na hringnun cu khuaitizu bangin a thlum mai ding.
3. Mi pakhat ruangah na hringnun hriamhma in a khat asile na mawhnak a um lo.
Asinan cui’ na hriamhma tuamdam dan na ngaihtuah lo a si ahcun na palh lawlaw a si.
Na hriamhma ngahmi bese lo dingin tokphirh hnuaihni hlah awla tuamdam in hngilh men aw.
4. Mi pakhat ruangah thih duhnak tiang na hringnun ah a thleng asile na mawh lo.
Asinan cuvek lungput pahsuak dingin na zuam lonak kha na palhnak a si.
Mi pakhat ruangah na hringnun vuiliam mai tum aw hlah. Ruahsannak thar thawn hmailam thlir sawn aw.
5. Mi pakhat ruangah na rilh, na bah asile na mawhnak a um lo.
Asinan na rilhbahnak ihsin thawhsal na tum lo kha na palhnak a si.
Mi pakhat ruang menah na hringnun a tlu soprop ding a si lo. Tho ṭenṭo awla thazang lasal in na ke kal thlang aw.
6. Mi pakhat ruangah na lungkuai cu na mawhnak a um lo.
Asinan cui’ na lungkuai, thinnatnak reipi na tuar cuahco kha na palhnak a si.
Lungkuai le thinna ih na tuarnak thli lakah zamhlo men awla thawveng zetih khawvel hmang thlang hnik.
7. Mi pakhat ruangah kiang le kapih soisel na sinak kha na mawhnak a um lo.
Asinan cumi an lo soiselnak na lak nat tuk kha na palhnak a si.
Kiang le kapih soisel men in na hringnun caurau hlah seh.
8. Na hringnun thuanthu bu na ngan sual ruangah na mawh lo.
Asinan cui’ na ngan sualmi remsal na tum lo kha na palhnak a si.
Na hringnun thuanthu bu na ngan ih a diklonak kha remsal awla mawi le siar nuam thei bikin ngansal aw.
Leave a Reply