Milai pakhatih thiltitheinak huham le ziaza zohṭhimtlak a sinak pawl tahfung pakhat a si.
Personality timi kan cuangmuarnak pawl bangranten khawruah theinak le dikdawh zetih mi pawlkom thiamnak pawl an si.
Ziangkim hi zir a theih vekin kan thiltitheinak le kan ziaza khal zir le remṭhat vivo a theih. Mi hip theinak huham nei theitu mi pakhat si dingah lamzin ṭhenkhat kan tarlang hnik pei.
1. Thungai nun nei aw: Personality Development ṭha dingih tuah zuam ṭulmi pakhatnak cu mi ih thurelmi rak ngaithlak ṭhatsak a si. Cumi cu Better Listener tiah an ko.
Mi pakhat thawn an ton/biakawk tikah na ngaihsakzia langternak ah a thurelmi ṭhatei’ na ngaisak a ṭul rori.
Thuṭhimnak menah mi pakhat thawn nan biakawk laiah a thurelmi ngai tho si in, phone rak thokthai phah tivek na cing lo pei.
Hihi a thurelmi na ngai taktak lo tinak a si ih na pehtlaihmi cu ziangah na siarlo, na upat lo ti thawn khal a bangaw.
Mi thungai theitu si hi mi hip theinak huham a si ih cuvekin na tuah thei asile nangmah riangri ngaisan na hlawh phah ding.
2. A ṭha lamih hmutu si aw: Personality ṭha ding cun a ṭha lamih hmutu, thlirtu na si tengteng a ṭul.
A ṭha lamih hmuhthiamnak hi pianpi thiamnak pakhat a si vekin zir khal a theih thotho.
Optimism pakhat hrangah remcang thil pakhat, hna ṭha ṭuan ding vek sawmnak a um tikah a se lam si loin a ṭha lamih ruat theitu pawl hi mi in an ngaina duh zet.
Thil ṭha lamih thlir thiamtu na si ahcun na lamzin a ongaw vivo ding.
3. Mi upat thiam aw: Milai hin thinlung takte le tangdor zetih pawlkomnak kan ngaina cio. Cumi cu kanmah lala khal kan mizia remṭhatawknak ah a rak ṭangkai zet fawn.
Mi thawn nan pawlkomawk tikah tiawter tuk, mi hmaisongnak pianpi lo tuk vek le duhduh tlokribak ih na um asile mi in an lo kawm rei paih lo ding.
Ṭongkam ihsin thok in ralring awla porhaw tuk le pawr tuk vekin um hlah. Mi na upat thiam a si ahcun mi khalin an lo upat ding ih kawmtu na ngah vivo ding.
4. Ka tuahthei timi zum aw: Ziangvekih thil harsa khal tong hman awla ka pahtlang thei, timi rinsanawknak na neih a ṭul. Buainak na ton tikah midang rinsan loin nangmah le nangmah rinsanaw thei dingin zuam aw.
Thil harsa tawttlang/pahtlang thei hi nun diriamnak a si ih ih mi ropi pawl ih hlawhtlinnak a si. Mah le mah rinsanawknak hi ṭih hrimhrim hlah.
5. Capohsaih paihtu si aw: Hihi personality dinhmun sang pawl ih hminsinnak pakhat a si.
Thil ziangkim a ṭha lamih an hmuhthiam ruangah ziangvek harsatnak khal olsamten an tuah thei ih an nun khal a zangkhai zet.
An thinlung in hriamhma a tuar caan khalah hnihsuak vekah an la thiam ih cutin nuam zetin an hni thei thotho. Hnihsuah capoh tuah paih nanana cu rualpi khal an ngah ih mi in an nel duh cuang.
Mahte hlim zetih khawsat thiamnak hin hringnun nehnak ropi a thlen duh.
Leave a Reply