Chin ramkulh, Matupi khawpi Sanbaw veng ih um kum 17 mi nunau pakhat cu ralkap pinsin la zo Major Win Naing kum 50 hrawng mi in June 25 sun ah a kaihhrem, tiah theih a si.
Major Win Naing cun nunau cu thusuh ding ka lo nei tiin a inn ah a hruailut ih a sualpi, tiah Zalen thuthang cun a tarlang.
Matupi khuami pakhat cun, “A unu hi April thla ah ralhrang tih in a tlansuak. Himi thu ah thusuh ding um vekin a ko. A kawh hnuah a kaihrem. A vanthatnak ah innhnen pawl an ra ih an run man. Asinan nupi sinak cu a hlawhtling man,” tiah a sim.
Major Win Naing hi Matupi ah kum 15 lai a um zo ih Matupi khua thuhla a theih zettu a si. Atu ih Matupi ih ralhrang bawi (ဗျူဟာမှူး) hnakin an tih sawn, tiah theih a si.
Cu hleiah Matupi ih kaihkhihawknak pawl hi Major Win Naing ih hohanak in a thleng tam.
“Anih hi pinsin a la zo. Asinan Matupi khawpi ih ralhrang cangvaihnak pawl hi a tam sawn cu amai’ hohanak in a si. Mipi kaihkhihmi pawl amai’ cangvaihnak hlir a si. Matupi khawpi thuhla theitu bik a si,” tiah tualsungmi pakhat cun a sim.
SAC ralhrang hrangih hnatuansaktu pinsin la zo Major Win Naing ih innsang cu Matupi Biuha kone ah an um, tiah theih a si.
Leave a Reply