Maktara ih mi bumhmang bur khat an kai, annih pawl hi khawte ah feh in mi an bum

An tonmi milai ta poh lungmolhnak sivai dawt le a phunphun ih bumtu mi bumhmang bur khat cu Tang Yang ah an kai.

Shan ramkulh saklam hmun tintian ah milai an tonmi pawl lungmolhnak sivai dawt ih a phunphun ih an bum hnuah an hlawnthil le ri laksaktu mi bumhmang bur khat cu Tang Yang khawpi ah an kai, tiah theih a si.

Mi bumhmang pawl hi mi 17 an si ih June 24 ah an kai, tiah tualsungmi pawl cun an sim.

Tang Yang khuami pakhat cun, “Kan kai ngah rori. Annih hi khuitawk ihsin ra an si ti kan thei lo. Tang Yang peng, Hui Kone ah an kai. Tang Yang khawpi thawn an kaihnak hmun a hlaaw tuk lo,” tiah a sim.

Hi misual pawl ih cangvaih dan cu tangka hlun le thar an thleng, phone hlun an lei, awngbali lem an zuar ih mi an bum vivo.

Hsipaw khawpi le Lashio khawpi lam khal an hrut thluh zo. Sivai mi an dawt ih an dawhmi pawl cu nazi pakhat sung lai an thinlung a molhmeh. Cumi sungah an hlawnthil, sui le ngun, sumpai an laksak, tiah mi pakhat cun a sim.

Hi mi bumhmang pawl hi Yangon lam ihsin ra an si an zum bik ih tlangpar miphun dang umnak khawte pawl an bum vivo.

Hui Kone khuami pawl in an kulh ih an kai thei. Atufang an kaihmi pawl ih dinhmun theih a si hrih lo, tiah Tang Yang khuami cun a sim.