Mah le mah rinsanawknak (Self-confidence) nei dingin zuam aw

Fimthiamnak pakhatkhat zirsuaktu, theikau zet le mi cungcuang deuh pawl hin mah le mah rinsanawknak an nei tlangpi.

Gym leknak in ṭahṭhim sehla. Hmaisabik Gym lek ding tikah zianghman kan thei hrih lo. Asinan kan lek rei vivo tikah lehdan kan thiam vivo mai ih kan Second Nature vekah a cang thlang.

Cuvekin mah le mah rinsanawknak khal taima zetih thil kan tuah hnu lawngah kan nei thei ding. Vei hnih vei khat cu kanmah ih thiamnak khal ringhlelaw in kan um ṭheu. Hihi cu ziaza thawn a pehtlaihaw men thei.

Zukzum le ṭihhrut deuh cun thil kan ti ngam lo ṭheu a si kha! Mipi hmaiah awmpo zetih kan len theinak dingah ziaza ṭha a rak thupi lala.

A cangah cun sunralnak le thil ṭha lo kan theihmi hrial harsa kan ti caan a um ṭheu. Kan mawhpalhnak siraw ding khopin kan ral a ṭha tawk lo lala.

Kan tuah sualmi thei cingin ziangtin kan remṭhaawsal ding, timi kan ruah ta lo asile mi hmaiah rinsanawknak thawn feh a theih lo. Rinsanawknak nei ding cun mah ih mawhpalhnak remawk ta a ṭul.

Mi ṭhenkhat cu mah le mah rinsanaw dingin midang thawn an tahṭhimaw ṭheu ih mah le mah ngainepawk an hmang lala. Mah le mah rinsanawk thei dingah midang nun va khaikhin ta a ṭul lo.

Midang thilri neihmi vekih va neih tum ve ringring hi rinsanawknak (confidence) a tling lo. Mi thu cawng nun fang a si.

Confidence derthawng zetih thil tuah pakhat cu ṭih cingtei’ thil tuah a si. Rinsanawknak neitu cun ṭihnak thinlung a neh ding a si hrimhrim. Ṭihhrutnak in kan thinlung tirh a fial thei a si ahcun rinsanawknak kan nei tawk lo, tinak a si ding.

Na ṭihmi thil ah na thinlung ret hlah.

Netabik ah kommi rualpi a thupi nasa. Na rualpi lakah Nagative zawngih thil thlirtu an tam asile mah le mah rinsanawknak Self-confidence a tlaniam vivo ding si mai.

Nitin na caan hmanmi ah mah le mah rinsan ngamawknak kiamterzawng ih khawruahnak pawl hlonhlo vivo aw.