Thisen dawk laithat hmang ‘vampire killer’ timi pa cun a nui’ hnenah tangka a dil ih a nu in a pek duh lo ruangah nam in a sun that. Cumi hnuah a nui’ thisen a dawk, tiah Daily Star thuthang cun a tarlang.
Thabang Mosoane kum 24 pa cun a nu Kedisaletse Elizbeth Moswane cu a thah hleiah a thisen a dawk (in) bet thu a phuangsuakaw.
Hi thil hi South Africa nitlak-saklam ramkulh, Koster khawpi innsang khatih thilthleng a si. Thabang Mosoane hin unau phirpi a nei ih a phirpi cun Thabang Mosoane ih a nu a thah le a thisen a dawk lai cu tuksum zetin a zoh cuahco hnuah palik a ko.
Palik pawl an va thlen tikah Kedisaletse Elizbeth Moswane cu a taksapum thisen kai hnianghniten an va hmu. A fapa khal a nui’ thisen kai in an va hmu ve.
Thabang Mosoane cun a nui’ hngawng nam ih ahnak zawn cu thisen dawk mikei vekin a nui’ thisen al cu a zuksak, tiah theih a si.
Thabang Mosoane hi rittheih sivai tham a si vekin a nui’ hnenah si-chauk leinak tangka a dil ih a nu in a pek duh lo ruangah tuvekin a nu cu a that.
May 30, tlawngkainikhat ah thuthennak zung ah Thabang Mosoane cu fehpi a si ih anih khal cun, “Ka mawh rori a si. Ka thubuai ah daan in tat lohli hram uh,” tiah a dil.
Thuthennak zung lenglamah a ni pahnih in an rak buk ih “Rampi pakhat ih sualnak rapthlak bik a si. A damsung thawngtla dingin daantat hram uh,” tiah an dil ve.
A ni Naomi Mosoane cun, “A nu a thah hleiah a thisen a dawk bet. Thuthennak zung in amahkhan pek hlah uh. Thawnginn ah a san sung khum uh. Kan sungkua hin a hmel hmuh ding kan duh nawn hrimhrim lo,” tiah a sim bet.
Leave a Reply