Nunau tam sawn hi duhdawtnak ah an ri buai ṭheu. Anmah ih duhmi mipa khi ziangvek lungput an nei timi ruat lemloin va aatcilh top an hmang.
‘Ka duh vekin i duh ve pei maw?’ ti lam ngaihtuah loin ‘ka duh hnuhnu cun a tawk’ tiah mipa pakhat parah an duhdawtnak an sungbungaw ṭheh men.
Cutikah caan a rei ih mipa in a duh ngaingai lo ti an theih tikah an bedongsal ṭheu. Beidong zo hnuah cun khua a rak tlai zet zo.
Curuangah ngaizawng ruangih beidong, lungkuai na ton lonak dingah atu fangih na pehtlaih bikmi kha zovek a si, timi zohsal aw. A lo duhdawttu taktak maw, asilole nangmai’ duh hrat ruangih caan reilote sung a lo kop mentu so a si!
Na beidong caan ah a lo thlahthlam mentu fang koppi na nei tla a rak si thei men sokhaw.
Asile mipa in a lo duh taktak maw, duh taktak lo ti na theih duh ahcun a tanglam thu pawl hminsin ṭha aw!
1. Bumawknak tel loih lo duhdawttu mipa: Tui’ na kopmi cun na parah samphang tia hman thuphan a rel lo ih langtlang zetin a lo pehtlaih asile a lo duhdawt taktak tinak a si.
A cangah cun na zum ban lo tiangin thudik a lo sim ṭheu ding ih cui’ thudik cu na ringhlel caan hman a um zuakzo ṭheu ding. Asinan na theifiang hnuah ziangtluk mipa rinsantlak a si ti na hmu vivo ding.
2. Buainak kian lotu mipa: Tui’ na kopmi mipa cun nan karlakah boruak siava, buainak tenau ihsin tumpi tiang a thlen tikah ziangtin a lo pehtlaih?
Buainak kian ih lo phatsantu a si ahcun a lo duh taktak lo tinak. Hmanseh buainak kha cinfel (phisin) ih a pahtlang ngam a si ahcun a lo duh taktak tinak a si.
Ṭhenkhat mipa cu ngaizawng lakah buainak tenau men hmanah an relhhlo men a si kha!
3. Thil fate tiangih lo ngaihsaktu mipa: Na hrangah a pumpekzia langternak ah a lo duhtu taktak mipa cun na ṭulsammi thil fate bik tiang a lo ngaihtuahsak ding.
Na lungawinak kha anih cun diriam zet le manhla a ti ruangah na nomnak ta rori a ruat ding. Thil fate men hman a lo ngaihtuahsak paih a si ahcun thil tumpi cu rel tam a ṭul nawn lo.
4. Na palh caan ah lo hnihsan mentu mipa: Milai cu cangsual thei, palh thei kan si. Na kopmi mipa in na palh caan ah lo mawhthluk loin a lo hnihsan men asile a lo duh taktak tinak a si. A lo hnihsan hi a lo nautat tinak a si lo.
‘Ziangkim a remcang leh ko ding sokhaw, Bawihte’ a lo ti theitu khi a lo duh taktaktu a si.
5. Na harsatnak kha a harsatnak vekih pom theitu mipa: Nangmah lawngin ṭuanvo la dingih na zumawkmi harsatnak tintian kha ṭuanvo rak la ngam vetu mipa khi a lo duhtu taktak a si.
Harsatnak tawttlang, tuartlang ngam mipa a si ahcun a lo duhdawt lawlaw tinak a si. A hleice in nunau ih harsatnak theithiam zettu, a hnenah thuhla ziangkim na thlen ngamnak, na phurrit lo sawng theitu khi a lo duhdawttu mipa rori a si.
6. A lo duat zettu mipa: Naite ih nan umtlang siseh, hlapi ih nan um khalah a lo ngaihsak le na thinharnak lo hnemtu mipa a si ahcun duhdawtnak diktak in a lo pehtlaih tinak a si.
Naite ih nan umtlang caan ah ṭongkam, cangvaih dan ih na thinheng ding a phan ruangah a ṭha thei bikih lo duat theitu, hlaral ih nan umsanawk tikah na thinlung ih na hlam ruahromi mipa a si ahcun a sual lo ding.
Anih cu a lo duhdawttu taktak a si ko. Si ee, a lo duhdawttu mipa cun ziangvek dinhmun, khuitawk a um hmanah a lo thlahthlam dah lo ding!
Leave a Reply