1. An kum zat theih: Leng u, val u pawl hin an kum suh an hua zet lawng si loin an ṭih zet fawn. Cu hleiah a tlangpithu in an kum khal ṭhiṭha in an rel duh lo ih an thup deuh tlangpi.
Facebook khalah an suah ni le thla an ret dik hmanah an suah kum cu a mal bik kum nga tal an ṭhum deuh tlangpi.
2. Mopuai feh an hiar lemlo: Sungkhat neiaw an um caan ah feh ding an huphurh zet. A san cu a neiawtu pawl hi a tlangpithu in an hnakin kum nauhak an si tikah an hmaisong ciamco.
Cun, mipi in, ‘Nang teh na nei thlang lo ding sawm?’ tivek ih thusuh a um ṭheu ruangah mopuai an feh hiarhal lemlo.
3. Capoh an dawl lo: Leng u le val u pawl hin capoh an ngaih tuk lo. ‘Tu tiangtiang nupi/pasal nei lo cu na tong lo thlurthlo mawsi?’ ti pang tla cun mi talh that an man. A zei deuh pawl cun, ‘Duhtu ka nei tam tuk nan, keimah in ka duh lo,’ tiah mi an phit men.
4. An laklawh: Sungkhat lole rualpi lakah laklawh zetin caan an hmang. Titi nuam rel vek khalah an thuhla rel pang an phang ih a relh in an relh ṭheu. An hnakih nauhak lakah tlanlen nuam an ti vek nan, mawihmang an ti lo lala.
5. An ngaih lomi ṭongkam: Val u an si le ‘nang hi na pa thei lo (tuai) mawsi na si?’ tivek ṭongkam an hrangah a kha fualfo. Leng u an si le ‘na mit a sang tuk ih cunah si hi pasal na ton thei lo, mai phutawk theithiam aw,’ tivek ṭongkam an theih cun an sunglam a cik zulzo si ko.
6. Dem an duh lo lala: Anmai kum thawn milaw ciah mi nikhua lo deuh, zangbeng deuh tivek khi dem sual pang ahcun an thinheng a ling in a ling. Leng u an si le ‘khawlu ih khimi pa khi nei men awla’ tiin dem sehla an duhlozawng a si phei cun ṭah lai an nuam.
7. Nupi pasal neih ding an ṭih: Kum a upat cun lung a fim deuhdeuh ih mi nupa nun le a si lozawng hlirin an hmuh tikah nupi/pasal neih ve ding an ṭih ih an khurh thlohthlo si ko.
Nau nawi pom vek an hmuh le phei cun an daw vek nan, ‘nupi/pasal nei sehla ziangtin khua kan sa ding, ti an ngaihtuahnak ah caan a liam vivo.
8. Minung an ṭih: Val u hin a tlangpithu in nupi nei hrih lo an si ahcun nunau ta poh an ṭih vivo. A hleice in fala kiangih um, fala taksa thawi hnorhmetawk hi an tak a za ih an kam a sur.
Curuangah hlaral in fala zoh hi an duhtawk men ṭheu, an kiangnai ih um cu a zarhtluk ah an ruat thlang. Leng u khal cu thotho, tikcu le caan a rei cun mipa an ṭih deuhdeuh. Mipa in malte an taksa dai pang sehla a rak in an rak.
9. Nuthlawi/pathlawi si an ṭih: Nupi/pasal nei ih thlawi cu a zia deuh lai. Vei khat hman nupi/pasal nei hrih lo khalin ‘thlawi’ an ṭih cu teh! Himi nu/pa nei bang sehla ṭhenawk leh pang nungla ziangtin? tivek men zanvar an ruat thei.
Thil ziangkim hi a sezawng deuh in an fehpi a bang!
10. Thih an ṭih: Zo cio khalin thih cu kan ṭih ṭheh ko. Asinan leng u, val u pawl hin thih ding an ṭih hleice. Fate rung pangvai ding ti zawngin ruah ding an nei lo nan, nupi/pasal, fanau hlawmtu nei lo ngaingai ih vung cem muarmo ding cu a ruat khal an ruat ngam lo.
Leave a Reply