Zan ihthah zawngah Kuam a ei ta ih a hak ih a thi

Kuam (kuva) hak in pacang pakhat cu a thi, tiah theih a si.

Yangon ramthen, Htatapyin peng, Leikone khua ih kum 30 mi, mipa pakhat cu kuam (kuva) a ngaina tuk ih zan a ihzawng ah a ei tikah a hak ih a thi, tiah tlawmngai pawlkom hnen ihsin theih a si.

“Anih hi Htatapyin, Leikone ah a um. Thilthlen dan cu a ihhmun ih kuam a ei ih phone a tham phah fawn. Phone a hman laiah a itthat.

Cule a kuam eimi cu a hak si ko ding. Tawkfang ah a tal rero ih kawh a theih nawn lo. Curuangah in rak ko hai ih sizung ah kan fehpi.

Sizung kan thlen tikah mina cu runsuah a theih nawn lo. Sizung kan thlen ih tawkfang in a nunnak a cem.

A kuam hakmi hin a thawthawt zin a phit si bik ko. Kuam ngainatu pawl ralring uh. Zan ihthahzawng vekah kuam ei hlah uh,” tiah Hlaing Thar Ya peng ih tlawmngai pawlkom hotu pakhat cun a sim.

Hlaing Thar Ya senpi sizung ih sibawi pawl hin mina cu zamrang thei bikin an tuamhlawm rero nan, an runsuak thei lo, tiah hi pa cun a sim hrih.

Sibawi pawl cu kuam hak ruangih thi a si le si lo theihfiang duh ah mithi cu postmortem an tuah ding, tiah theih a si.