Kan dung thla May 18, zinglam nazi 8 hrawngah South Korea ram khawpi Seoul, Cheongdam-dong, Gangnam-gu lamzin ih motor accident zuknung lemcangthiam huleng Kim Sae-ron cu zu a ri, ti an hmuhsuak ruangah thubuai tuahsak a si.
Huleng Kim hi lamzin sirih Transformer pungpi le thinglung a pah ruangah a hmunah palik pawl an thleng cih.
Thilthlen dan a mak deuh ruangah palik pawl in rinhmainak an nei ih Alcohol Test an tuah tikah zu ri cingin motor a mawng timi an hmusuak vivo.
A thok ahcun huleng hin a thisen sungah zu tha ziangtluk a um timi check an tum tikah a duh lo ih a tang nasa. Asinan an check thotho tikah a thisen sung khalah zu in a ciahneh zet zo ih tahfung 0.08% tlukin a lan.
Curuangah huleng Kim cu driving license tiang lonsak thei dinhmun a si.
Huleng Kim Sae-ron cu accident thu ah zianghman thubuai tuahsak loin an thlah ih a inn ah a tlung men.
Curuangah a theitu mi thenkhat an lungawi lo zet. Zu ri cingih motor mawng le accident tiang tong huleng Kim le amah thapetu pawl cu daan vekin hremnak pe dingah an nor thlang.
Cutin June 29 ah Seoul ih Gangnam palik sakhan cun thubuai tuahsak dingah an tawlrel rero, tiah theih a si.
Thubuai hi an fehpi vivo asile a sangbik kum 5 thawngtlak le Won 10 million kuanter ding a si.
Leave a Reply