KNU Brigade (tatmaha) 3 luah ram sungih SAC ralhrang sakhan (5) cu KNLA le tangrual pawl in an laksak thu KNU in official in an than.
Hi sakhan laknak ahhin Battalion Commander pakhat a thih hleiah ralthuam tam zet an laksak thu KNU in an phuang.
SAC ralhrang sakhan an laksakmi pawl cu Nyaung Lay Pin District, Mong Township, Kyaung Pyia sakhan, Aung Laung Sein sakhan, Kyun Pin Seik sakhan, Kawpyin sakhan, Kyaung Su sakhan pawl an si ih July 2, zinglam nazi 4:45 ah KNLA le tangrual pawl in vei khat lak ah an laksak.
SAC ralhrang Battalion thihnak sakhan hi Kyaung Pyia sakhan a si ih hi sakhan doawknak ah khatlam khatlam thi le hlo an um, tiah KNU in thu an suah.
Aung Laung Sein sakhan, Kyun Pin Seik sakhan, Kawpyin sakhan le Kyaung Su sakhan donak ahcun ralhrang 4 an thi ih midang cu an tlanhlo thluh. Meithal 8 le ralthuam tam zet an laksak, tiah KNU in an sim.
Hi sakhan pawl an thianfai laiah SAC ralhrang in Fighter vanzam in an rak kap, tiah an sim fawn.
SAC ralhrang in vanzam ih an ra kah ruangah khuami pawl an tlan ih mawhnak nei lo khuami Saw Bea Che le a innsang 4 pawl cu an kap that ih Kyun Pin Seik khua ih kum 70 mi Saw Dokaru cu a awm le kawngpi ah hriamhma a ngah.
Tu dinhmun ah SAC ralhrang in khua tam zet ralthuam ih a kap ih ralhrang dang khal ra bawm dingin an cah ruangah doawknak a sosang zet thei, tiah KNU cun an rel.
A dikdawhmi thuthang pawl hliakhlai vivo ih thuthang suah bet dingah KNU cun thu an suah.
Leave a Reply