SAC ralhrang ralkap sakhan Ukritha bawm dingih va feh Tatma 44 cu KNLA, KNDO le PDF tangrual in an rak kap ih lamzin parah an thi phengpheng hai, tiah KNDO Captain El-Saywar cun a sim.
Karen ramkulh, Myawaddy peng, Ukritha ralhrang sakhan bawm ding ih va feh ralhrang rual cu June 30, zinglam ah KNDO Captain El-Saywar hohanak in an rak cilh ih ralhrang lam tam zet an thih hleiah ralthuam khal tam zet an laksak thei, tiah theih a si.
SAC ralhrang lam hin Ukritha sakhan sunralter duh loin leipar ralkap tam zet a thlah hleiah tlunvan ihsin khalin a kap.
“Tui’ zing nazi 6, June ni 30 a si. Tatma 44 ihsin ralhrang tampi rak kuat uh. Nazi pakhat sung hman kah nan tlak lo. Nan meithal pawl hi an hmu ko maw. Tampi in ra uh.
Ka hmin saal rori in in ra hawl hnih uh. El-saywar timi hi KNDO captain keimah pakhat lawng ka um,” tiah video ihsin KNDO captain cun ralhrang pawl a ngiar ciamco hai.
Ralhrang ralthuam an laksakmi pawl khal video rori in phosuahnak an ei. Meithal, ziandawng le drone kahnak pawl an si.
Ni 5 sung doawknak ah KNLA, KNDO le PDF tangrual pawl cun ralhrang ralkap sakhan Ukritha cu lak ngah tengteng tum in an bei.
Ralhrang lam khalin an sakhan sunral ding ngai ngam loin tan an rak khawh ve ih tlunvan lam ihsin Fighter in bomb an thlak.
Leave a Reply