KIO/KIA mi le sa tam zet SAC ralhrang in an kai

KTV ih nuamtawl KIO hnatuantu an kai SAC ralhrang cun KIO mi le sa KTV ih nuamtawl an kaihmi pawl thlazuk phosuahnak an nei.

Myitkyina khawpi, တပ်ကုန်း veng ih Happy KTV ah November 12 zanttim ah KIO mi le sa SAC ralhrang in an kai ih an thlazuk pawl ralhrang dinpitu Telegram cun tuni ah a pholang.

An kaihmi hi mi 16 an si nan, mi 11 lawng an tarlang ih an kaihmi pawl cu ‘tapung pawl’ timi catar thawn an kut an khit ih khukbilter in an ke ah thirhri an khit fawn.

An kaihmi lakah nunau pathum an tel ih nunau 3 cu an suah, tiah theih a si.

Ralhrang ih an kaihmi pawl hi KIO kaihhruainak in ukawknak lam training kaitu pawl an si, tiah KIO thawn naihniamaw zet pakhat cun BBC hnenah a sim. “KIO ukawknak ih teltu pawl cu an feh, an tlung theu ko.

KIO/KIA ralkap lawng hramlak ah an um. Hi an kaihmi pawl cu KIA ralkap si loin ukawknak lam milai an si ih khawpi sungah an leng. Atu vekin an kaih hi zuarthlai an um cek ding,” tiah a sim.

KIO mi le sa kaih an si thu thawn pehparaw in KIO thuphuangtu Colonel Naw Bu cun thuthang an theih thu le cipciar lawngte an theih lo thu a rel.

KIO hnatuantu kaih an si ruangah Kachin mipi, social media hmangtu lakah vuivainak tongkam a suak tam zet.