Kawl pawl in ‘miphun u’ timi an thupom an thlah thei hrih lo, tiah KIO Chairman in sim. Kachin Independence Organisation (KIO/KIA) in Dothleng kum 62 kimnak an tuahnak ah KIO Chairman General N’Ban La in a tanglam bangtukin a sim.
“Atu caan ah SAC ralhrang uknak a zunghram ihsin karsiat dingin ram pumhuap ih do caan a si ko.
KIO hin NUG le mipi ralkap pawl thawn SAC ralhrang do bor dingin ttan kan khawh ve nasa. Asinan, Kawl pawl hin ramkhel an hmuhdan lungput fiangfai zetin an thlengh thei hrih lo.
A olzawng cun Burmanization timi Kawl miphun u timi thupom an kaihnget lai. Federal Demcracy rampi dinsuah a si tikah ramkulh le Federal Unit tin din ding a si. Mipum tam ruangah hamtthatnak an co tam cuang ding a si lo.
Mipum tam an si khal le Bama ramkulh timi din a tul. Cuvekin midang ramkulh le Unit hnakin an covo a uak cuang lo ding. Himi hi kan ram buainak cinfel dan umsun a si.
Hi buainak cinfelnak khalah pawlkom pakhat men in hma a la ding a si lo. ‘Miphun u’ timi khawruahnak le bulpak thuneih duhnak in kum tam zet in fehpi zo. Tuni ih dothlengnak tuahtu NUG, Kawl mipi le pawlkom hin ‘miphun u’ khawruahnak tiangin an do ngam a tul thlang.
Cuti si loin ‘miphun u’ lungput an neih ringring asile dothlengnak a sosang sinsin ding,” tiah a sim.
Cu hleiah KIO Chairman General N’Ban La cun, “SAC ralhrang hi caurau ek a thai lai caan fangte ah dothlengtu mipi pawl ralkap pawl in lungrual zetin kan do bor a tul.
Tuvek caan ah zohman soiselaw le dokalhaw hnuaihni loin khat le khat tihzah upat pekawknak thawn kan tanrual a tul rori,” tiah a sim hrih.
KIO/KIA dothlengnak kum 62 kimnak ah KIO Chairman General N’Ban La in cahmai 7 ih khat thucah a sim hleiah hminkhennak khal a nei, tiah theih a si. (Kachin News, The 74 News).
Leave a Reply