Hpa-Saung, Bawlakha ah ralhrang lamcaw phur motor 40 run cu Karenni ṭangrual in an rak kap ih motor 2, Drone kahnak Anti-Drone ralthuam tel in meithal 4 an laksak thei.
Karenni ramkulh, Hpa-Saung, Bawlakha peng sungah SAC ralhrang ral hmaituang sakhan hrang lamcaw phur motor cu an kirsalnak lamzin ah Karenni tangrual pawl in June 1-2 ah an rak bawh ih an kap.
Himi ah SAC ralhrang tam zet an thi ih raldo motor tum zet 2, meithal 4 le ralthuam thenkhat an laksak thu KNDF ralkap pakhat hnen ihsin theih a si.
Ralhrang motor runpi cu Karenni ralkap (KA) le Karenni National Defense Force (KNDF) tatzin 16 komkhawmaw in an rak kahmi a si. Ralhrang motor 2 hleiah Drone kahnak meithal, ralthuam tum cerek, Solar, meithal 4, ziandawng tam zet le ralhrang Tatma 66 ih uniform pawl an laksak.
“Ralhrang Motor 40 runpi cu Thale khua ah kan rak bawh. Hinah a remcan lo ruangah dung kan sip ih June 2 ah nisuahnak khua pakhat ihsin kan rak kapsal. Ralhrang tam zet an thi.
A netnak ah vanzam in bomb in ra thla. Simlam nazi 4 hrawngah motor 36nk le 38nk cu kan laksak thei,” tiah KNDF ralkap pakhatin a sim.
Hi doawknak ah SAC ralhrang lam cun vanzam in bomb an thlak ih Karenni tangrual lam in mi pakhat in hriamhma tenau a ngah, tiah theih a si.
Leave a Reply