Civil Disobedience Movement(CDM) ih tel duh lo, Chin ramkulh, Kanpetlet peng sibawi Aung San Oo telin acozah hnatuan 8 pawl cu Kanpetlet khawpi ihsin dawisuah an si thu Kanpetlet-CDF cun a sim.
An dawisuahmi pawl hi Kanpetlet khuami le khaw dangmi khal an um, tiah Kanpetlet-CDF ih thuphuangtu Salai Tun Ling Thang cun a sim.
“Minung 8 kan kai ih cawhkuan kan pe. Kan peng sung mipi uknak hnuaiih lairelnak zung cun Non CDM pawl ih covo le tuar dingmi daan kan suah zo bangin Kanpetlet khawpi ihsin kan dawisuak hai si ko. Kan kai ih hremnak kan pekmi pawl lakah khuami an tel bangin khaw dangmi khal an si,” tiah a sim.
Pengpi sibawi Dr. Aung San Oo, loram lam hotu U Van Toe, Khawnutum National Park kiltu U Tun Tin, Middle School uktu U Aye Maung, pengpi fimthiamnak zung ih cazi Daw Om Yaung, Middle School zirhtu saya Swe Ling, pengpi loram zung ih cazi Daw Thuzar Aye le Daw Shin Kee Ling pawl an si.
Pengpi sibawi Dr. Aung San Oo ih Kapetlet mi le sa a si ruangah ramsung ah um hrih dingin thupek a si, tiah CDF thuphuangtu cun a sim.
CDM tuah duh lo acozah hnatuantu pawl cu CDF in kai ih tuvekin an thuhla ngaihtuah an si ih ziangtikih kaihmi an si ti lawngte an tarlang lo.
Hremnak an pekmi pawl hi SAC ralhrang thawn pehtlaih in hnatuan nawn lo dingah le mipi lamah tang duh loin an um vivo asile na takin hremnak pek sinsin an si ding thu Kanpetlet-CDF cun thu an suah. (RFA).
Leave a Reply