Kalaymyo senpi sizung ihsin CDM sibawi ralhrang in an kai

Sagaing ramthen, Kalaymyo Senpi sizung ih CDM Assistant Doctor မြင့်မိုရ်ကျော် cu December 26 zingah ralhrang in an kai, tiah SAC ralhrang dinpitu thuthang in a tarlang.

Dr. မြင့်မိုရ်ကျော် hi Kalaymyo, မြိုသာ veng ih ralhrang check gate ah bike ih a feh lai an kai. Hi tawk Check Gate ahhin mipi veivak pawl sumpai an khong theu ih Dr. မြင့်မိုရ်ကျော် khal sumpai khong dingih an dintermi a si nan, a phone an zohsak tikah CDM sibawi a si, an thei ih an kai, tiah theih a si.

Dr. မြင့်မိုရ်ကျော် kum 35 hi a phone sungah PDF hriamhma tuar pawl a tuamhlawm lai thlazuk an hmuh ruangih kai an si, tiah SAC ralhrang dinpitu thuthang cun thu an than.

SAC ralhrang in Myanmar rampi thuneihnak a lak hnu harhdamnak hnatuantu pawl kaih, hrem le thahmi an nei hnuaihni zo ih 2021, February ihsin 2022, October tiangah harhdamnak hnatu 58 an thi zo ih 700 lenglo kaih le soisat an tong.

Sizung/sikhan 50 lenglo, mina phur motor 40 lenglo siatsuahsak an si, tiah NUG ih harhdamnak tlangbawi zung cun a than.

Be the first to comment

Leave a Reply

Your email address will not be published.


*