Kalaymyo mipi lunnak ah Pyusawhtee helhlong 2 an kap that

SAC ralhrang dinpitu Pyithusit hmincawi, Pyusawhtee training thehsuak mipa 2 cu Kalaymyo, Pinlung lamzinpi ah Kalay Thupthiar Cangvaitu pawlkom in an kap that, tiah theih a si.

November 11, sun nazi 1:45 hrawngah Kalewa lam ihsin ra luhnak Pinlung lamzinpi thlanglam ttumnak ah Pyithusit sungtel, ကံပုလဲ khawmi Pyusawhtee Aung Win Htay timi le mi pakhat cu kah an si ih an thi.

Annih hi Pyithusit hmincawi in အောင်မင်္ဂလာ veng ih camsai Pyusawhtee pawlkom sungtel an si. An kahnak hmun hi lamzinpi pathum tonawknak zinsawm a si ih bazaar le mi veivak tamnak hmun a si.

Pyusawhtee sungtel Aung Win Htay hi 2022, February ah Kalay peng, nisuahnak, ပြင်သာ khua ih Kalay PDF le ralhrang doawknak ah ralhrang lamah a tel ruangah, ‘raltha zetin raldotu a si,’ tiah SAC ralhrang (ဒကစ- ကလေး) ih sunlawihnak capi an pekmi a si.

Hi doawk ttum ah SAC ralhrang captain 1 telin ralhrang le Pyusawhtee 12 an thi.

Kalaymyo ah Pyusawhtee sungtel 2 that an si ruangah ralhrang in mipa bike ih phurhaw an khap ih hnatuannak ihsin tlung mipa pahnih bike ih phuraw cu ni dangah bike ih phuraw nawn lo dingin le bike ih nan phurhawk lai kan lo hmuh asile kan lo kap ding, tiah ralrinnak an pe, tiah theih a si.