Kalaymyo, Thingunau veng ih khawsa kum 12 Lian Sian Mung cu thilri ting 10 man le ting 5 man ruk thubuai ruangah veng sungmi in an kai ih thuhla an zoihnit phah ah kutthlak in an vuak ruangah a thi, tiah tualsungmi pawl ih simmi Zalen sirhsan in theih a si.
Lian Sian Mung kum 12 hi a nauhak laiah a nu in a thihsan ih a pa cun nupi dang a nei ih nu-ei tuar a si. Tlawng a kai lai ihsin a tlawngkaipi pawl ih cafung, ruler le eraser tivek ruk a hmang zet zo, tiah a tlawngkaipi ih nu le pa pawl in an sim.
A nu in a thihsan ttum ah an inn ihsin ni thum sung a hlo dah, tiah amah thei zettu in a rel.
Vanduaithlak zetin Lian Sian Mung ih pa le a nu-ei hi zu ricin an si, tiah theih a si ih Lian Sian Mung cu a nu-ei in hmu thei loin kawk le vuakvelh a tuar theu, tiah theih a si.
Lian Sian Mung cu leitlun pulhhri len ruangah tlawng cawlh sung a si ih cumi caan ah lamzin ah a vak hawngkawng ih amah hnakih kum upa pawl kop vivo in rittheihthil hman a cing thok. Cumi hnuah mi inn bauh le thil fir an thiam vivo, tiah a sungkhat pawl hnen ihsin theih a si.
2022, November 1 ah inn pakhat an bauh ih tangka ting 10 le ting 5 man thilri thenkhat an ruk ruangah vengsungmi pawl in an kai.
Lian Sian Mung cu a hlan thil an rukmi pawl khuitawkah nan thup? Zo pawl thawn nan ru-tlang? Tiin zoihnihnak an nei.
Cutiih thu an suh lai khalah Lian Sian Mung cu lungruh zetin tthittha ih a phuanawk lo ruangah thingtan in an vuak phah. Cumi hnuah Kalaymyo ih Zomi Youth Association (ZYA) hnenah an ap.
ZYA hotu pakhat cun, Lian Sian Mung hi a hlan khalah rukru thubuai 3 ruangah kaih a si zo ih nunsim hnuah thlah a si thu, a rel.
Lian Sian Mung cu nazi 1 sung deuhthaw thingtan ih hlap a si ruangah a hremnak hmunah a thi, tiah mit ih hmutu tualsungmi pawl in an sim.
Kum pitling hrih lo nauhak pakhat,pacang 4-5 laiin thingtan in an vua timi cu nauhak parah hleiluat in cangvaihnak rori a si, tiah Kalaymyo ih pastor pakhat cun a sim.
Pastor cun, “Hihi pom menmen a theih lo. Rukru cu thubuai kan tuahsak ding asile a pehtlaihmi pawlkom thawn daan vekin hmalak ding a si. Tuvekin hremawk ciamco hi a hremtu pawl lala daan an buar a si.
Cu hleiah kum 12 fangte a si ih a nun remthat tul lai caan a si. Atu-ahcun kut-hngam zetin an tuahmawh ruangah a thih phah. A hrem thattu pawl hi ngaidam theih lomi sualnak an tuah tiin ka hmu.
Cu hleiah Chinmi cu Christian kan si vekin an cangvaih dan hi Christian zawngin siseh, Chin nunphung zawng khalin a mawi-hmang lo tuk. Nauhak pakhat in ziaza tha lo a nei, timi hi amah khurh-omtu nu le pa ih santlaih lo a si vekin a umnak kawhhran khalin tuanvo a nei ve.
Pakhat leh cu, nauhak thih thu thawn pehparaw in Zomi Media pakhatin a liam zomi ni 3 laih a rak post mi a si.
A post mi theithiam lotui’ hrangah cun nauhak hi ruk a ruk hnuah rinlopi’n a thi, tiah a ngan. Ziangruangah a thi? timi a tarlang duh lo. Zo pawl ih kutthlak a si? Timi cu Hmunlai khaw kiangkap cun an thei theh ko.
Himi thu ah Zomi Media hmangin anmah le anmah an hupphenaw tiah a sim theih. Asinan, thiltha lo tuahmi cu thuh a theih lopi. An tuhmi vekin caan khatkhatah an atsal leh ding,” tiah a sim.
Lian Sian Mung ih ruak cu a sungkhat pawl in an vuiliam, tiah theih a si. Video le thlazuk ih a lang dan ah a takruang cu vuak durhnak hriamhma in a khat ih a hmuihmel a siat tuk ruangah a theiciatu pawl hmanin an palh thei, theih vivo a si.
Lian Sian Mung thihnak thu tarlangtu Zomi Media pakhat cu tualsungmi pawl in an soisel bor vualvo, tiah theih a si.
Leave a Reply