Kalay thlanglam ralhrang le KPDF ni thum sung doawknak cipciar

Kalaymyo thlanglam khua pawl ah SAC ralhrang le mipi doawknak ni thum sungah khatlam khatlam thi le hriam an tam zet.

Kalaymyo thlanglam khua a simi Tinthar, Ashih Si, Do Nwe khua ah ke ih ra luttu ralhrang 100 kiangkap pawl cu lamzin ah bomb (6) kammi a puak ihsin July 16 zinglam ah doawknak an thok cih.

“Ralhrang hi lamzin pahnih in an rak lut. Tin Thar lam ihsin 70 hrawng, Ashih Si lam ihsin 30 hrawng an si. Kannih Ashih Si lam ih ra luttu pawl cu bomb (6) kan rak kammi lakah (3) an pal puak ih ralhrang 10 hrawng a hmun ah an thi. Bomb kan kammi hi hridai ih kan khihmi a si ruangah naitein kan hmu thei ko.

Cule Tin Thar lamih um pawl kan lamah an ra heraw ih ralhrang pawl cun ralthuam tum hmangin in kap ciamco. Zan nazi 7 tiang doawknak kan nei ih PDF lamin Ko Moe D in in cemsan.

July 17 ah doawknak a suaksal ih peng 4 hrawng hlatnak Do Nwe khua ah ralhrang pawl bu an khuar. Doawknak a sosan tuk ruangah Do Nwe khuami ziangmawzatin khua an suahsan ih a tangmi minung 3 cu ralhrang lam in an that. Cun, Do Nwe khua saklam ih um thing ahnak cet ih hnatuan khal an kapthat. Hi ni hi sunvu kan pelaw ih kahawk rero a si.

A thitu pawl hi kum 40 mi U Kyaw Aung, kum 20 mi mino (hmin theih lo), kum 15 mi Maung Tha Pha, kum 27 mi Maung Maung Aye le kum 40 mi U Htee Lwin an si.

“Mipi thenkhat hi khua khalah um ngam loin an tlan ko nan, cuticingin an relhnak hmun ah an va kap thotho. Khaw sung inn pawl khal lak ding um nawn lo ko, an coklet theh. Mankhung thilri, hnipuan pawl an la. Caw le vok khal an zuah lo,” tiah Do Nwe pa in a sim.

No description available.

July 18 zinglam ah ralhrang pawl cun bu an khuarnak hmun Do Nwe khua ihsin hramlak ah ralthuam tumpipi in an kap ciamco lala. Cuti ralhrang lamih ralthuam tum an hman ruangah tualsung doawknak cu dung kan sipsan hrih,” KPDF lamin an sim.

“Minung thazang kan nei ko. Kan tulsam bikmi cu hohatu tha le raldo thiam le hreihriam tha rori a si. Hi pawl nei famkim thei sehla kan neh tengreng ding. Tu khal kan theitawkin kan do ih kan neh zikte,” tiah KPDF pakhat in a sim.

Doawknak a suah thok ihsin tuni tiang hi khua mi senpi pawl hi ralhrang tih in hramlak ah an relh lai. (Mizzima)

Be the first to comment

Leave a Reply

Your email address will not be published.


*