Social media hi meisa vek a si. A hmang thiamtu hrangah a tangkai rualrual in a hmang thiam lotu hrangah cun nun kangralnak men a si.
Tleirawl kum 12 mi cu Social application pakhat Snapchat ruangah hmuhsuam a tong ih a nunnak in a tuar phah.
Tleirawl nute cun sivai luarkai tukih a hman ruangah sizung ah zan 4 a riah hnuah June 12 ah mual a liam.
A hmin hi Semina Halliwell a si ih a nu cu Rachel Halliwell a si. A nu cun Liverpool kiangih Southport ah a fanute cu kaihhrem sualpit a si hnuah a thinlung lam a dam nawn lo, tiah a sim.
“Ka fanu hi a thinlung a kim nawn lo. In sim netabik cu kaihhrem a ton thu a si,” tiah a nu cun a sim.
“Ka fanu hi hmuar a tuar thei tuk. A lung that lo ruangah vei thum rori ah (operation) a si ih cumi khal a pahtlang thei. Tleirawlte a si ih a thianghlimnak par an khiahsak. Cumi hnu khalah online ihsin hmuhsuam le nautat a tong tam tuk,” tiah a nu cun a sim bet vivo.
Rachel Halliwell hin a fanu vuinak ah mi tam zet sawmkhawm a tum lawk nan, cakuat tihnung zet a don ruangah a sawm ngamsal lo. Curuangah Semina Halliwell an vui tikah palik pawl in an bom phah.
Semina Halliwell hi tleirawl duhnungte a si ih a hmel khal a tha. Mi a aipuangter thei zet. Hlasak phah ih laam khal a paih. Kaa ih sim theih lo khopin kan riah a sia.
Ka thinlung sungah silhkhah thei lomi hmun lawnglak a um ringring si ko, tiah a nu cun lungkuai zetin a sim.
Leave a Reply