Kachin ramkulh, Phakan peng, KIA Brigade 9 luah ram, အနန်ပါ (A Nang Pa) ah mizan October 23 ih KIO din cam kum 62 kim, hmuahnak concert an neih laiah SAC ralhrang in Jet Fighter in bomb a thlak ih mi 60 in nun an liam, tiah KIA thuthang sirhsan in Mizzima in a than.
SAC ralhrang cun mizan nazi 8:30 hrawngah KIA Brigade 9, အနန်ပါ (A Nang Pa) hmunah Jet Fighter 3 rori in bomb an thlak ih KIA ralkap, Kachin thiamzung (Artists) le mipi tam zet an thi.
“Concert bat ih bomb ra thla an si ruangah mi tam zet an thi. Mithi hi 60 hrawng an si zo. KIA captain tam zet an tel,” tiah KIA thuthang in a sim.
Himi contuahnak ah Kachin thiamzung (Artists) 9 in an hmanpi ih cumi lakah 4 in mual an liam, tiah theih a si.
Thiamzung (Artists) mualliamtu pawl cu Kachin lemcangthiam huval Lahtaw Zau Ding (လထော်ဇော်ဒိန် ), zaithiam Aurai (အော်ရာလီ), zaithiam Galau Yaw Lwin ( ဂလောင်းယော်လွင် ) le Keyboardist Ko King (ကိုကင်း) an si, tiah Kachin thiamzung pawlkom hnen ihsin theih a si.
Asinan lemcangthiam huval Lahtaw Zau Ding hi a thi titu le hriamhma roh zet a tuar titu an um ih tu tiang nemhngeh a theih hrih lo, tiah Mizzima cun a sim.
SAC ralhrang in KIA ralkap hotu pawl, KIA ralkap le Thiamzung (Artists) pawl bomb a thlak thu ah KIO/KIA cun thusuah an nei hrih lo, tiah theih a si.
Leave a Reply