‘Ka pasal neih ni talah ka nu le pa hmuh ka duh’ tiin nauhak laiih an rukmi nute in a nu le pa a hlam

A nauhak lai ihsin rukmi nunau pakhat cu pasal a neih ding ni thlen hlan talah a nu le pa ngaingai ton a duh thu a rel.

China miphun mothuam in a thuamaw ih social media ah a nu le pa a hmuh duh thu a tarlang ih a lar phah.

Bai Xuefang hi kum 24 a si thlang. Anih hi kum 3-4 mite a si laiah ruk a si ih Yuan 1000 in zuar a si. Curuangah a nu le pa a cing nawn lo ih kum 3 a si laiih zuk pakhat cu a hnenah a um.

“Kum 11 ka si hnuah ka dinhmun diktak ka theisuak. Curuangah in latu innsang thawn thukam kan elaw ringring. Annih cu in vua ih in hringhro theu,” tiah Bai Xuefang cun a sim.

Anih cu kum 17 a si ah hnatuan a thok ih Guizhou, Yunnan, Shandong, Henan le Beijing khawpi pawl ah tlawng in a umnak innsang a cawm.

Atu-ahcun Bai Xuefang cu China nunphung in-ei zuarnak dawr a ong ih a dawr phar ahcun a nu le pa ngaingai a hawl thu ca a tar. 2015 laiah a nu le pa a hawl zo ih tu cun kum 7 a hawlnak a rei zo.

“Kei hi a rei hlanah pasal ka nei thlang ding. Mopuainak ah ka nu le pa an tel thei ka beisei. Hi video a rak hmutu pawl hnenah ka nu le pa na hmuh asile in bawm hram uh,” tiah a dil.

“Ka nu le pa ngaingai ton ka duh rori. Nauhak zuarmi hmuahhmuh hin mai’ suahnak nu le pa thawn tonawk kan beisei theh,” tiah a sim.