June 5, zan nazi 8 hrawngih Yangon, Dagon Myothit saklam, 37 veng ih Myanmar Idol zuamawknak ih tel Zin Gyi an kah thatzawng ih an kah that vemi nunau cu a fapa in, ‘ka nu hi dalan a si lo’ tiah a rel.
Dagon Myothit saklam 37 veng, Anaungyathar lamzin ih ‘Emperor Beauty Salon’ ih hnatuan nunau cu Zin Gyi lu a kholhsak rero laiah kah that a si, tiah a fapa cun a sim.
“Ka nu hi zan nazi 8 ah dawr a khar theu. Hi ni cu Zan Gyi ih lu a kholh ruangah a tlai deuh. Kei cu ka nu ka hnam ta ih room dangah Game ka rak let. Game ka lek laiah meithal puak awn vei thum, vei li lai ka thei.
Vei li meithal a puak hnuah ‘a ngamngam ra suak uh, kan lo kap that thluh ding si mai,’ tiah an au-aw ka hei thei. Cumi hnuah ‘phung’ tiin meithal zun khat a puak bet.
Bike lole motor in an tlanhlo thluh. Ka khawruah a har ih leng ka va suak cu dawr hmaiah ka nu thisen bual in a rak tlu. Ka nu hi dalan a si lo. Duhphorhnak tuah lai khalah a rak tel. Nan zum lo asile a thlazuk tampi phorh ding ka nei,” tiah a fapa cun a sim.
Ziang a si khal le a pehparaw lomi nunau pakhat kah that thu ah mipi le dothlengnak pawlkom lakah ralhrang in thenthekawkter duh in an cangvai a si bik ko, tiah Little Hero ih tuanvoneitu pakhat cun a sim.
“Kannih cu ralhrang le a dinpitu pawl kan thianfai caan ah mipi kap ngah lo dingin kan hrial theu. Kan theih dan ah himi kahawknak ahhin mi 5 an si ih ‘a ngamngam ra suak uh’ tiah an au tikah dawr sung ihsin nunau pakhatin a va zoh ih an rak kap.
A kaptu pawl hi an uniform khal a bangaw theh tiin kan nei. Kannih cu khawpi sung kan cangvaih tikah uniform bangaw kan hruh ngam lo.
Ziang a si khal le mipi le dothlengnak tuahtu pawl lakah thenthekawknak suahter an duh ruangah a si bik,” tiah a sim.
Hi kahnak hi Ultimate Revolutionary Movement Team (URMT) ih cangvaihnak tiin theih a si nan, nemhngeh theih ngaingai a si lo, tiah Mizzima thuthang cun a ngan.
Leave a Reply