Jordan Chlorine Gas putsuak ah mi 12 thi, mi 250 lenglo sizung thleng

Jordan ram ih tipikap pakhatah Chlorine Gas a zun ih mi 12 an thih hleiah mi 250 lenglo sizung an thleng, tiah Reuters thuthang cun a ngan.

June 27 ah chemical thilri phur longpi cu a thil phurhnak bawmpi a hnget tawk lo ruangah a tla ih Chlorine Gas a putsuak ciamco.

Security Camera ih a zuk dan ah hi longpi hi rinlopin a cangsual ih a thil phurhmi Chamical cu eng zuaizo in boruak a luahkhat thluh.

A kiangkap ih minung pawl cu thin le ham kaiaw loin an tlan ciamco nan, Gas khu hawp ngah ruangah mi 12 an thi man thotho.

Mi 250 lenglo cu sizung ah tuamhlawm an si ih ni rei nawn tuamhlawm a tul men thei, tiah acozah lamin an theihter.

Chlorine Gas hi cetzung le inn sung thianfainak thilri hrangah hman tlangpi a si. A tlangpithu in rong hring-eng Gas hi an phurh tikah an khalter ta theu.

Chlorine gas a hawp ngahtu, a dawlh ngahtu cu an taksa ah tursia vekin hna a tuan ih acid ah cang in cell pawl a that thei.

Chlorine gas hawp ngah a si ahcun cuap ah tidai a tling ih thawthawtnak ah harsatnak a thlen.

Hi Chlorine Gas phur cangsualnak ruangah tipikap thawn peng 10 hrawngih hla Aqaba khawpi ih minung pawl cu inn leng suak lo dingin thuneitu pawl in ralrinnak an pe.

Tipikap khal khualtlawng sukso um lo dingin an kham hrih ih a umcia pawl khal hmun dangah an thawnter hai.

Hi cangsualnak cu acozah lamin khunnguh zetin hliakhlainak an nei ih a phurhnak bawmpi tawnnak steel thirhri pakhat a cah ruangah a si, tiah an sim.

#عاجل | فيديو حادث تسرب غاز من صهريج في العقبة#الأردن #العقبة #التلفزيون_الأردني pic.twitter.com/MZqeoUvxtG

— Jordan TV-التلفزيون الأردني (@JrtvMedia) June 27, 2022

Hi longpi hin Chlorine Gas ton 25 ihsin ton 30 tiang a phur theu ih Iraq lamah an kuat theu.