Japan acozah cun hlawhhlang hnatuan dingih norawknak khamnak hrangah daan thar June 15 ah an nemhnget. Hi daan hi Japan in a hmaisabik an tuahmi daan a si.
Daan thar ahcun ruangrai le thiamnak ruangih model tuantu le zuknung lemcangthiam pawl khawlkhawm tahrat in video borhbah le pitling zuknung tuah dingih norawk siseh, hnipuan hirha zetzet hruhternak pawl dokhamnak a si.
Thenkhat model lar le lemcangthiam pawl cu contact an sign-nak company hin an duhduh in thuneihnak an hmang ih pitling zuknung tuah dingah an lungkim lo cingin an nor theu.
Curuangah model le lemcangthiam pawl cu company ihsin an duh caancaan ah an suah thei ih ca-chuk khal an phiatsal thei. A hleicein pitling zuknung tuah an fial caan ah a el thei ih an hna ihsin an bang thei fawn.
Cule company an suahsan tikah ziang hremnak hman pek an si lo ding ih zalen zetin an duhmi hna dang an hawl thei, tiah daan thar ahcun an ngan.
A hlanah cun movie pakhat a suah hnu kum 2 tiang lungkimnak ca-chuk an tuah ih cumi hnuah anmai’ duhmi hna an tuan thei fang. Atu daan thar ahcun kum khat (thla 12) lawng ca-chuk tuah a si dingih lungkim lo asile phiat theihsal a si ding.
Hi daan thar hin thangthar nonawn pawl nuamtawlnak hmun ihsin a hruaisuak thei ding ih an thinlung harsatnak pawl a sawk zangkhai thei ding, tiah Tokyo ih lawyer Kazuko Ito cun a sim.
Leave a Reply