Innsangnu pawl hnenih thucah (14)

1. Na pasal kha ziangtik hmanah awka hro in be hlah. Aw hrang zet ringpi khalin auh ṭheu hlah.

Mi in an lo theih tikah na pasal na ṭihzah lozia a lang ih na hmin a se ding.

2. Na pasal kha pacang dang pawl thawn va ṭahthim hlah. Mi pasal pawl ih phenah ziangvek thu a um, ti tla na thei ban cuang lo.

An nupi pawl fel ruangah pacangṭha ih suak fang tla an si thei.

3. Na pasal ih tlamtlin lonak kha sungkhat le rualpi hnenah sim hlah. A fel lonak na theih veten nangmah in remsak lohli sawn aw.

4. Na pasal rualpi kom ṭheumi pawl zahpah lo takin be aw hlah.

Cuvekin na be hai asile a rualpi ṭha pawl in nupi ṭhen dingin an forh pang thei ih pasal na canlak ding.

5. Innsangnu bik na si vekin tenrenaw aw. Na pasal in thlanhri baksen tla ih a hawlsuahmi tangka hmang in momsom le thil lolam leinak ah rak khawhral hlah.

6. Na pasal kha mi lakah thusawn ṭohṭoh hlah. A ṭong laiah rak tibuai hlah la, a anngai thiam aw.

Na duh asile inn nan thlen tikah thu ṭhaten na sim leh ding.

7. Na pasal siannak dil ta loin thil ṭul loah vak zutzo aw hlah. Na dil ih a lo sian lo asile me biobio loin ṭhaten um men aw.

8. Na pasal ih theihpi lomi thuthup siseh thil tuahmi siseh nei aw hlah.

Ziangkim ah langtlang takin um awla na pasal in a lo rinsan ding.

9. Thukam malte elawk men, tawhawk men ruangah khawtlan tum ṭengṭeng hlah.

Na kaa ihsin, ‘kan ṭhenaw men ke,’ tivek saalsuak citcet hlah.

10. Na pasal cu a hlawhtlin caan ah na lompi thiam bangin a hlawhsam caan le a thanau caan ah hnemtu ṭha si aw.

Hlawhtlin laiih lomawk hnakin hlawhsam caan ih thazang pek thiamnak hin mi a neh zet.

11. Innleng nan neih tikah na pasal anngai loin ṭong zutzo aw hlah.

Na pasal ṭong hlanah rak pawt man ṭheu hlah la, mi in nupi zaidam ti na hlawh ding.

12. Innsangnu na si ruangah ṭophnop tukin um cuang hlah.

Naukai nei zo na si khal le thur hiamhiam in um aw hlah. Na falat lai hnakin let in ceiawk taima sawn aw.

Ziangahtile nupinu na si hnu khi na taksa in ceiawk a mamawh laifang a si sawn.

13. Pasal hnipuan hruh ding, thilri a hman ding pawl a retnak theihsak thluh aw.

Na pasal khawlak a len zikah maw, biakinn a feh zikah maw, a hnipuan hruhmi cekfelsak aw.

Mi lakih a mualpho pang asile a hminsetu cu nangmah thotho na si.

14. Rawl suan thiam tum aw. Ziangvek thlairah thlaihnah a si khal le a suangtu in duhsahten a bawl thiam ahcun an thaw ṭheh.

Nupinu sisi rawl suan thiam tum lo, a ei lawng thiam na si ahcun nutling na si dah lo ding.

 

Be the first to comment

Leave a Reply

Your email address will not be published.


*