Innsangnu in pasal parih an lungawi thei lomi (5)

Duhdawtaw zetin nunau le mipa cu innsang din a si. Tikcu le caan a hung rei vivo tikah nupa nun kel a awh nawn lo ih khat le khat mikhual vekin kakawk vivo a theih.

Hivek buainak tete hi a tlangpithu in mipa ruangah a si deuh ih a tuartu hi nunau an si deuh ṭheu. Mipa zate cun an si lo hmanah mipa ṭhenkhat cu nupi an neih hnuah an thinlung a thlengh danglam ṭheu, tiah an sim.

Nunau lawngte an duh lemlo mi mipa hman khi, pasal ih an neih hnuhnu cun an duhdawtnak a hnget sinsin.

Ziangruangah innsangnu pawl in an pasal parah an lungawi lo ṭheu.

1. Innsang hrang caan an pek lo ruangah:

Innsangpa bik cun a innsang, a nufa hi a hmaisabik ih a ruah dingmi a si.

Mai’ innsang, mai nufa hrangah caan pe loin rualpi le hmun dang lawnglawngah caan a pek a si ahcun a nupi hrang lungretheihnak a si.

Innsangpa bik, mai nufa hnenih caan pe dah lo pawl hrangah an nupi cu thinhar, beidong le nuncau in an um ṭheu.

Himi zawnah innsangpa bik cu sungkhaw cawmtu a si ruangah hna a ṭuan ding hrimhrim a si. Asinan innsang ngaihsak man lo tiangtiang cun hna ah thinlung pek tuk lo ding a si fawn.

2. Thuronawk lo ruangah:

Innsang khatih nunkhawmnak ah khat le khat thuronawk derhdo ding a si.

Cumi laiah innsangpa bik cu nupi thuron duh loin amai’ duhnak lawngin thil a tuah ringring caan ah innsangnu ih lungthin a kek ṭheu.

Nunau thurontlak lo ih ngaitu pacang dunglamah a nupi cu thinthip fialfiten a mitthli a hnul rero ko.

3.Ṭongkam thlahdah tuk ruangah:

Innsangpa bik si ruang le sumpai laluttu bik si ruangah duhduh ṭong rero ding, tinak a si cuang lo.

Ṭongkam sia, nufa parih hrinhronak awkam saalsuak ringring asile innsangnu bik nun a hlim thei lo.

Mipa ṭongkam sia neitu nupi hrangah muthla tih ih tihawk a si ṭheu.

4. Lal duh tuk ruangah:

Innsangpa bik si ruangah ziangkimah thuneih thluh, lal berber ih khawsat ding a si lo.

Mai’ nupi parah thuneih duh tuk le uk neh tum tuk ruangah kutthlak siseh, then le mak dingih hringhro ringring siseh nunau hrangah a nuam riai lo.

‘Ka lu parah sam lawng a um’ ti bangin zo ih ruahnak pekmi khal thlun duh lo mipa, pasal ih neitu nunau cun a damsung ah nomnak a tep dah lo. Nun beidong in a kur cuahco ih a netnak ah a thupten a pasal a hua vivo.

5. Rinum lo ruangah:

Nunau pawl hin innsang harsatnak phunphun parah theihthiamnak, tuar theinak an nei zet. Asinan an parih rinum lo, phatsantu pasal lawngte an ngaidam thei lo ṭheu.

Himi ruangah anmah phatsantu, nunau dang va kop hmang, an pasal khi an hua lawlaw a si ko.