India acozah cun ralkap lak thar daan an tuah tharmi ah a ram mipi pawl lungawi loin duhphorhnak nasaten an nei.
India ram lailak Bihar ramkulh ahcun duhphorhtu mipi pawl cun senpi thil le rei an siatsuah, tlangleng cawlhhmun zung pawl an luhhnawh ih an siatbal.
Mino thawngtel cun tlangleng an urkang ih tlangleng hnatuantu pawl thawn buainak namen lo a suah phah. Palik 4 hriam an tuar vekin mipi lam khal mi 12 lenglo an kai, tiah Bihar palik lam cun an sim.
India ram pumpi ah June 15 ihsin duhphorhnak an thok ih mi 2 an thi zo.
India acozah cun kumtin ralkap a la theu ih 2022 hnuin a ralkap lak dan a thlengh.
Ralkap hi thawngsawmli (40000) ihsin thawngsawmruk (60000) karlak lak ding a si ih kum 4 sung lawng an tuan ding. Cumi lakah 25% lawngin damsung an tuan ngah ding. A dang 75% cu cawlhter an si ding, tiah acozah cun June 15 ah thuthannak a nei.
Kum 4 ralkap an tuan hnuah lak pehzom/tling lotu pawl cu zangnadomnak US Dollar 14000 tluk a simi India tangka pek an si ding ih thil dang pinsin hlawh siseh hamthatnak hrimhrim an co nawn lo ding, tiah thu a suah.
PM Narendra Modi ih party BJP acozah cun rampi budget thumnak hrang ruahsan in ralkap lak thar pawl hrangah tuvekin daan thar a nemhngehnak a si.
Curuangah India ramsung mipi, a hleice in ralkap lut duh mino pawl lungawi loin duhphorhnak an nei.
Duhphorhnak a luarkainak hmun cu Uttar Pradesh, Bihar, Rajasthan, Haryana, Uttarkhand, Jharkhand le ramkulh hmun dangdangah a si.
Leave a Reply