Netherlands The Hague khawpi ih the International Criminal Court (ICC) ih a thuptei’ luh tum Russia thlingthlatu (spy) cu The Netherlands’ General Intelligence and Security Service (AIVD) in an kaih thu June 16 ah thu an suah.
2008 laiih Russia-Georgia buainak ruangah Russia ralkap pawl ih sualmawhnak le atui’ Ukraine ram siimnak ah Russia ih sualmawhnak pawl ICC hin hmala dingin a tawlrel rero.
Curuangah Russia cun ICC sungah lut in an sung thu pawl siatsuah a tum, tiah theih a si.
An kaihmi pa hi kum 36 ih upa Sergey Vladimirovich Cherkasov a si ih anih cu Brazil rammi vekin a tuahawk hnuah Netherlands ram Amsterdam, Chevrolet Airport ah 2022, April ah a zuanglut.
Russia thlingthlatu (spy) ih tumtah dan ahcun ICC zung ah training kai dingin a dil ih ICC zung innpi sung a luh thei asile computer system pawl cokbuai a tum, ti a si.
Asinan The Netherlands’ General Intelligence and Security Service (AIVD) in an thei lohli ih an kai. Netherlands ramsung ih a luhnak san le an ram Russia thawn ziangtluk pehtlaihawknak an nei ti pawl an hliakhlai hnuah a ra pawhsuahnak Brazil ram ah an kuatsal.
Hi Russia thlingthlatu Sergey Vladimirovich Cherkasov cun a tirah cun amai’ bulpak thuhla ah Netherlands ram ih tlawng a si thu a pheh lawk nan, an rinhmai deuh ruangah an kuat kirsalnak a si.
Kuat kir lo hai sehla hi pa hin Netherlands le ICC ih humhimnak lam nasa zetin a siatsuah in a derthawng phah thei, tiah Netherlands thuneitu pawl cun an sim.
Leave a Reply