Huleng dawh Thin Zar Wint Kyaw an kaih thu nemhnget a si

Social Media ah huleng dawh Thin Zar Wint Kyaw an kai timi thuthang cu a rualpi sar thar pakhatin a nemhnget ih a innsang lam thawn pehtlaihawknak an nei thei hrih lo tiah RFA hnenah a sim.

Thin Zar Wint Kyaw an kai timi thuthang ruangah a innsang lam cu an thla a phang zet, tiah a rualpi sar thar hmin tarlang remcang lo pakhat cun a sim.

Thin Zar Wint Kyaw cu July 6 zinglam ah Shan ramkulh Lashio lamah hna pakhat ruangah a feh ih cumi ihsin pehtlaih a theih nawn lo, tiah a sim.

Kaih a si le si lo, a innsang lamin an theih lo vekin SAC ralhrang lam khal thuhla suhhliahnak a um hrih lo, tiah a rualpi cun a sim.

Thin Zar Wint Kyaw cu July 4 ahkhan Kyethi Township, Wan Hai ih tuahmi Shan State Progressive Party (SSPP) thuphuangtu Colonel Sai Su ih fanu tei’ neihawknak ah a telpi ih SSA ralkap uniform a hruh.

Himi ruangah SAC ralhrang lamtang cun pawl Thin Zar Wint Kyaw hi kaih a tul tiin social media ah tlang an au celcel. Ziangahtile atu fangahhin SSPP/SSA le ralhrang hi an halawk zet lai fang a si.

Hi mopuai ihsin a tlun lamah SAC ralhrang ih check gate pakhat ah an kai, tiah Shan ram hrambun Shan Thuthang cun a tarlang.

SAC ralhrang ih thuhla thehdarhnak Telegram ah ‘Thin Zar Wint Kyaw hi hriamhrei kai pawl thawn pehtlaihawknak an neih ruangah kaih ding hrimhrim a si, tiin ca an thlah hnuah tuvekin a innsang lam thawn an pehtlaihawknak a catnak a si. (RFA).