Na hringnun cu nangmai’ kilkhawi dingin Khuanu in na kut ah a lo pe.
Curuangah na hringnun nomnak dingah na zuam thei tawkin zuam aw. A tanglam thu pawl in malte tal a lo bom thei ka beisei.
1. Mi ih ṭongkam menah ṭhumaw tuk hlah: Na kiangkap minung pawl in lo duhsak tuk vekin an lo soisel maw, fakder a si hmanah za ah za zum duh hlah.
Cutin khatin um maw, na ṭawl tuk, na thau tuk, tivekin an lo soisel caan ah zum duh hlah. Nangmah ih mil le rem ih na theih dan vekin na nun hmang men aw.
2. A liam zomi thu ruatin donhar ṭheu hlah: A liam zomi caan ih na lungawi lonak, na tuah sual pangmi pawl ruat in donhar nawn hlah.
Hivek na ruah tam asile na thin a cik deuhdeuh ding ih hmailam khawthlir thiam lo ko, na thinhengnak cun thimkhawzing a lo panpi pang ding.
3. A cang hrih lomi thil helhkam in ruat duh hlah: Thil pakhatkhat na tuah zik tikah a ra cang theimi siatnak maw, ṭhatnak pawl ruatcia in na nun ah hlimnak le donharnak nei in helhkam tuk hlah.
Na co dingmi laksawng cu a tikcu ah na ngah thotho ding.
4. Na paihzawng thil tuah mai aw: Milai hin mai paihzawng kan nei cio. Ziangvek thil a si khal le na paihzawng a si hnuhnu midang ih thuronnak lak ciamco ṭul loin tuah mai aw.
Kan paihzawng hna kan ṭuanmi ah hlawhtlinnak a um ih lung diriamnak khal a si rori.
5. Na theih loih an lo relmi na theihsal tikah salhsuah duh hlah: Mi in na thuhla a thupthiar ih an lo relmi an lo simsawng tikah thinheng in salhsuah va tum hlah.
Na sinak diktak tla a si thei ih zir dingmi an lo sim tla a si thei.
6. Na sunralmi pawl pamhmai duh hlah: Na caan siseh, na nun siseh mumal lo zetih na rak hman sualmi pawl pamhmai in siraw duh hlah.
Cuvek na ruah ruangah an ra kirsal nawn lo ding. Cu hnakin a ra lai dingmi caan hrangah timtuah ṭha sawn aw.
7. Na duhmi in a lo phatsan tikah lungawi aw: Na duh kuahkomi na ngaizawng in a lo phatsan caan ah lungkuai in um hlah. Lungawi sawn aw.
Ziangahtile minung pakhat ih sinak tuanten na zir ngah ih lehhnu na kop dingmi parah ralrinnak na neih thei phah ding.
8. Lak tam hnakin pek tam zuam aw: Peknak ah lungawinak a um, an ti vekin lak lamah na kut zum awla peksuah lamah na kut hlaw seh.
Tampi na peksuakawk asile na hringnun a hnianghnar deuhdeuh ding.
9. Na kiangkap luarkai tukin ngaihsak hlah: Na kiangkapih thilthleng, minung nunphung pawl na tikcu caan heu in ngaihsak tuk hlah.
Ziangahtile nang na um le um lo khal an lo thei lo tla a si thei ih nang khalin na ngaihsak ciamco a ṭul lo.
10. Na cantawkah diriam aw: Duham le hamṭamnak ih khat leitlun ah a nei tam in neih sin an duh vivo ih a netnak ah khuarkhuhrumpi ah an tla ṭheu.
Asinan, nang cu na neihtawk ah lungawi awla cucu hnangamnak thuthup a si.
Leave a Reply